بی ایس پی کا ڈومیسائل قانون کے خلاف احتجاج

جموں و کشمیر میں ڈومیسائل سرٹیفیکٹ جاری کرنے کے خلاف خطے جموں میں آج بہوجن سماج پارٹی کے رہنماؤں اور کارکنان نے احتجاج کیا۔

جموں و کشمیر بہوجن سماج پارٹی کے صدر سوم راج مجہوترا نے احتجاج کے دوران ذرائع ابلاغ کے نمائندوں سے بات کرتے ہوئے کہا کہ جس طرح سے ڈومیسائل قانون جموں و کشمیر میں نافذ کیا گیا اور اب اس قانون کے تحت ڈومیسائل سرٹیفیکٹ جاری کیا جا رہا ہے جو جموں خطہ کے لوگوں کے لیے خطرہ ہیں۔

انہوں نے کہا کہ بیرون ریاست کے لوگوں کو ڈومیسائل سرٹیفیکٹ جاری کر کے جموں کے عوام کا حق مارا جا رہا ہے۔ بی جے پی ایک غلط موضوع اٹھا کر لوگوں کو گمراہ کر رہی ہے۔

راج مجہوترا نے بتایا کہ جموں کے نوجوانوں کی نوکریوں کا حق بھی چھین لیا جائے گا کیونکہ بیرون ریاست سے آئے ہوئے لوگ اب جموں کشمیر میں نوکریاں حاصل کر سکتے ہیں۔ انہوں نے جموں کے عوام سے اپیل کی کہ وہ اس قانون کے خلاف خاموشی توڑ کر کے اس کے خلاف آواز اٹھائیں۔ انہوں نے سرکار سے اپیل کی کہ اس قانون کو جلد از جلد واپس لیا جائے۔