رامبن: ڈاک بنگلہ مختلف محکموں کی آپسی رسہ کشی کا شکار

مقامی لوگوں کا الزام ہے کہ اگرچہ محکمہ تعمیرات عامہ نے جدید ایڈمینسٹرٹیو کمپلیکس کے قریب سرکٹ ہاوس تعمیر کیا تھا مگر انتظامی سربراہوں نے نواب شاہی حکم صادر کر کے اس کو صرف گورنمنٹ افسروں اور انکے مہمانوں کے لیے محفوظ قرار دیا ہے۔

مرکزی زیر انتظام جموں کشمیر کے ضلع رامبن میں حکومت کی جانب سے درماندہ مسافروں کو رات میں رُکنے اور کھانے پینے کی سہولیات بہم رکھنے کے لئے ایک ڈاک بنگلہ تعمیر کیا گیا تھا جو محکمہ تعمیرات عامہ کی ملکیت تھی۔ تاہم ڈاک بنگلہ ٹورزم ڈیولپمنٹ کارپوریشن کی زیر نگرانی کام کر رہا تھا۔

پانچ سال قبل ڈاک بنگلہ کی عمارت کو حکام نے غیر محفوظ قرار دیا اور عمارت میں سبھی سرگرمیوں پر قدغن عاید کردی۔ اس سلسلہ میں عمارت کی نئی تعمیر کے لیے ٹینڈر بھی طلب کے گئے تھے اور ٹھیکیدار کو کام بھی الاٹ کیا گیا تھا۔ تاہم محکمہ ٹورزم اور محکمہ تعمیرات عامہ کی آپسی رسہ کشی کی وجہ سے تعمیراتی کام شروع نہیں ہو سکا۔ جس کے وجہ سے صدر مقام پر درماندہ مسافروں کو زبردست مشکلات اور مصائب سے دو چار ہونا پڑرہا ہے۔

مقامی لوگوں کا الزام ہے کہ اگرچہ محکمہ تعمیرات عامہ نے جدید ائڈمینسٹرٹیو کمپلیکس کے قریب سرکٹ ہاوس تعمیر کیا تھا مگر انتظامی سربراہوں نے نواب شاہی حکم صادر کر کے اس کو صرف گورنمنٹ افسروں اور انکے مہمانوں کے لیے محفوظ قرار دیا ہے۔

اس سلسلے میں ای ٹی وی بھارت نے ڈویژن انجینئر تعمیرات عامہ سے بات کرنے کی کوشش کی لیکن انہوں کمیرے کے سامنے بات کرنے صاف انکار کر دیا۔ تاہم انہوں نے کہا محکمہ ٹورزم عمارت کو خود ہی تعیر کروانا چاہتا ہے جس کی وجہ سے عمارت کی تعمیر رک گئی ہے۔

لوگوں نے لیفٹننٹ گورنر انتظامیہ سے سبھی رکاوٹیں دور کر کے ضلع صدر مقام میں نئے ڈاک بنگلہ کی تعمیر کا مطالبہ کیا ہے۔