ترال: غریب کے گھر چوری

جنوبی کشمیر کے ترال علاقے میں واقع لاڈی یار گاؤں میں دوران شب نقب زنوں نے ایک غریب شہری کے چالیس بھیڑ چرا کر اسے ہاتھ ملنے پر مجبور کر دیا ہے۔

تفصیلات کے مطابق نقب زنوں نے لاڈی یار ترال کے رہنے والے عبد الرشید شاہ کے گاؤ خانہ میں داخل ہو کر اسکے چالیس بھیڑ چرا لیے جس کی وجہ سے ان کا اہلخانہ ہاتھ ملنے پر مجبور ہو گیا ہے۔

معلوم ہوا ہے کہ عبد الرشید نامی شہری کے پاس ان بھیڑوں کے علاوہ کوئی زمین زراعت نہیں ہے ان کا اہل خانہ ان ہی بھیڑں پر اپنا گزارا کر رہے تھے۔

ای ٹی وی بھارت کے نمائندے نے جب لاڈی یار کا دورہ کیا تو وہاں ہر آنکھ نم اور ہر فرد پریشان پایا گیا۔ ہمسایوں کی ایک بڑی تعداد عبد الرشید کو دلاسہ دینے میں مشغول تھی۔

ای ٹی وی بھارت کے ساتھ بات کرتے ہوئے عبد الرشید نے بتایا کہ وہ آج صبح جب چارہ ڈالنے کے لیے گاؤخانہ میں گیے تو یہ دیکھ کر اس کے پیروں سے زمین کھسک گئی کہ اسکے بھیڑ چرا لیے گیے ہیں۔

اس کا مزید کہنا تھا کہ وہ عیال بار ہے بھیڑوں کے سوائے اسکے پاس کوئی دوسرا وسیلہ نہیں ہے۔

روتے بلکتے ہوئے عبد الرشید شاہ نے بتایا کہ آج اس پر ایک ناگہانی آفت آگئی ہے اپنی روداد سناتے ہوئے انہوں نے کہا کہ اسکی اہلیہ گردوں کے عارضے میں مبتلا ہے اور اسکو ہر ہفتہ ڈایالسز پر ہزاروں روپے خرچ ہوتے ہیں۔

انہوں نے انتظامیہ سے مطالبہ کیا کہ اسکو بھر پور مالی مدد کی جائے۔

وہیں وہاں موجود ایک بزرگ نے اہل ثروت لوگوں سے اپیل کی کہ اس غریب خاندان کی مدد کے لیے آگے آئیں۔ ادھر اونتی پورہ پولیس نے معاملے کی نسبت کیس درج کر کے تحقیقات شروع کردی ہے۔

واضح رہے کہ ترال کے مختلف دیہات میں حالیہ ایام میں چوری کی بڑھتی ہوئی واردات سے عوامی حلقوں میں زبردست تشویش پائی جا رہی ہے۔