شوپیان میں محاصرے کے دوران دو لڑکیوں سمیت درجنوں زخمی

ریاست جموں و کشمیر میں ضلع شوپیان کے پنجورہ علاقے میں دوپہر سے جاری محاصرے کے دوران فورسز اور مظاہرین کے بیچ جھڑپوں میں دو لڑکیوں سمیت 28 افراد زخمی ہوگئے ہیں۔

زخمی افرادکو فوری طور ضلع اسپتال پہنچایا گیا جہاں سے دو لڑکیوں سمیت چار شدید زخمیوں کو سرینگر کے ایس ایچ ایم ایس ہسپتال منتقل کیا گیا ہے۔

واضح رہے کہ پنجورہ شوپیان میں عسکریت پسندوں کی موجودگی کی خفیہ اطلاع ملنے پر حفاظتی اہلکاروں نے علاقے کو محاصرے میں لے کر تلاشی کارروائی شروع کردی۔

اس دوران کافی تعداد میں آس پاس کے علاقوں سے لوگ آئے اور فورسز اہلکاروں پر پتھراؤ کیا جنہیں منتشر کرنے کے لیے فورسز اہلکاروں نے آنسو گیس کے گولے داغے، پلیٹ گن کا بھی استعمال کرنے کے علاوہ ہوائی فائرنگ بھی کی۔

ان جھڑپوں میں دو درجن سے زائد افراد پیلٹ لگنے سے زخمی ہوگئے جن میں سے چار کو سرینگر منتقل کیا گیا ہے۔

پنجورہ علاقے میں محاصرہ جاری ہے اور حالات پر تناؤ بنے ہوئے ہیں۔

آخری اطلاع ملنے تک مظاہرین اور فورسز کے بیچ جھڑپیں جاری تھی۔