نوگام ویری ناگ میں ریچھ کے حملہ میں ایک شخص زخمی

جنوبی کشمیر کے ضلع اننت ناگ کے ویری ناگ کے نوگام شاہ آباد علاقہ میں جنگلی جانوروں نے کئی دنوں سے لوگوں کا جینا محال کر رکھا ہے۔

آج نوگام ناڑ کے جنگل میں ریچھ کے حملہ میں ایک مقامی بکروال زخمی ہو گیا۔ مذکورہ بکروال علاقہ میں انپے بھیڑ بکریوں کے ساتھ تھا کہ اچانک ریچھ نے بکریوں پر حملہ کیا جس کے بعد بکروال، اپنے مال مویشیوں کو بچاتے بچاتے ریچھ کے حملے میں زخمی ہوگیا۔

ویری ناگ کے پلوس چوکی افسر مظفر احمد ڈار نے ای ٹی وی بھارت سے بات کرتے ہوئے کہا کہ مقامی بکروال محمد رقیب کھٹانہ ولد محبوب کھٹانہ عمر پچاس سال ریچھ کے حملہ میں بری طرح سے زخمی ہو گیا جس کے فوراً بعد اس کو نزدیکی پی اچ سی ویری ناگ اسپتال میں منتقل کیا گیا۔

اس سے پہلے بھی اس علاقہ میں جنگلی جانوروں نے کئی بار مقامی آبادی کی طرف رُخ کیا جس کے بعد گاؤں میں خوف و ہراس پیدا ہو گیا۔

مقامی لوگوں نے ضلع انتظامیہ اور محکمہ وائلڈ لائف سے مداخلت کی اپیل کی۔