دارالخیر کی جانب سے آتشزدگی متاثرین میں ضروری اشیا کی تقسیم

دارالحکومت سرینگر میں واقع الوچی باغ میں آتشزدگی کے واقعے میں چار مکانات پوری طرح سے جل کر راکھ ہوگئے۔ اس واقعے میں بھاری مالی نقصان ہوا۔دارالخیر کی جانب سے آتشزدگی سے متاثر لوگوں کے درمیان ضروری اشیا کی تقسیم کی گئی-Kashmir Darul Khair Mirwaiz Manzil

سرینگر:مرکز کے زیر انتظام یوٹی جموں و کشمیر کے دارالحکومت سرینگر میں واقع الوچی باغ میں آتشزدگی کے واقعے میں چار مکانات پوری طرح سے جل کر راکھ ہوگئے۔ اس کے علاوہ گھاٹ نمبر ڈل جھیل میں پانچ ہاوس بوٹ بھی آتشزدگی میں جل کر راکھ ہوگئے۔ اس واقعے میں بھاری مالی نقصان ہوا۔ دارالخیر کی جانب سے آتشزدگی سے متاثر لوگوں کے درمیان ضروری اشیا کی تقسیم کی گئی۔اس کے علاوہ دارالخیر میرواعظ منزل سرینگرنے دکھ اور افسوس کا اظہار کرتے ہوئے سرپرست دارالخیر میرواعظ کشمیر مولوی محمد عمر فاروق کی طرف سے متاثرین کے ساتھ دلی ہمدردی اور یکجہتی کا اظہار کیا ہے اور متاثرین کی فوری باز آبادکاری کی ضرورت پر زور دیا ہے۔

وفد نے گھاٹ نمبر9 ڈل جھیل میں آ گ سے خاکستر ہوئے ہاؤس بوٹ مالکان کے ساتھ جناب میرواعظ کی طرف سے طرف سے یکجہتی اور ہمدردی کا اظہار کیا اور متاثرین کی بازآبادکاری پر زور دیا۔ دارالخیر نے عوام الناس سے دردمندانہ اپیل کی ہے کہ موسم سرما میں گرمی حاصل کرنے کے آلات گیس،ہیٹر بوائلر، پاور کمبل اور کانگڑی وغیرہ استعمال کرتے وقت ہر ممکن احتیاط برتنے کی کوشش کریں تاکہ ممکنہ حد تک ناگہانی آفات اور آتشزنی کے روز افزوں بڑھتے ہوئے افسوسناک واقعات سے بچا جاسکے۔

اس موقع پر تنظیم دارالخیر میرواعظ منزل نے یہ بات پھر دہرائی ہے کہ ملت کشمیر اس حقیقت سے باخبر ہے کہ دارالخیر میرواعظ منزل اپنے قیام کی مدت سے لیکر آج تک برابر اپنے مخلصین کی ہر ممکن مدد کرتی رہی ہے۔