' شاہ فیصل اور جاوید مصطفی میر اپنے فیصلوں پر نطر ثانی کریں'

دس برس بیوروکریسی میں رہنے کے بعد شاہ فیصل نے گزشتہ برس مارچ میں سول سروس سے استعفیٰ دے کر سیاسی جماعت 'جموں و کشمیر پیپلز موومنٹ' کی بنیاد ڈال کر 'اب ہوا بدلے گی' کا نعرہ دیا تھا-

جموں و کشمیر پیپلز موومنٹ کے صدر اور بانی شاہ فیصل نے سیاست سے کنارہ کشی اختیار کر کے وادی کشمیر میں عوامی و سیاسی حلقوں کو حیران کردیا۔

جموں کشمیر پیپلز موومنٹ نے شاہ فیصل اور پارٹی کے چیئرمین جاوید مصطفی میر سے اپیل کی کہ وہ اپنے فیصلوں پر نظر ثانی کریں اور دوبارہ سے پارٹی میں شامل ہوں۔

جموں کشمیر پیپلز موومنٹ (جے کے پی ایم) کے ورکنگ صدر محمد حسین نے پارٹی کے دیگر اراکین کے ساتھ سرینگر میں ایک پریس کانفرنس منعقد کی۔

پریس کانفرس کے دوران ورکنگ صدر محمد حسین نے شاہ فیصل اور جاوید مصطفی میر سے اپیل کی ہے کہ وہ اپنے فیصلوں فیصلوں پر نظر ثانی کریں ۔

واضح رہے کہ پارٹی کے چیئرمین جاوید مصطفی میر کی جانب سے پارٹی سے استعفیٰ دینے کے فوری بعد شاہ فیصل نے بھی استعفیٰ دے دیا تھا۔

حسین نے کہا کہ ' اگر پارٹی کے اراکین کے مابین کوئی تنازعہ ہے تو ہم سب کو میز پر آکر تمام معاملات حل کرنے کی اپیل کرتے ہیں۔'

پریس کانفرنس کے دوران محمد حسین کے ہمراہ پارٹی کے دیگر اراکین موجود تھے جن میں عمر راتھر ، ڈاکٹر مصطفی شامل ہیں۔

واضح رہے کہ 37 سالہ شاہ فیصل نے سنہ 2010 میں سول سروس امتحان میں پہلی پوزیشن حاصل کر کے ریاست کا نام روشن کیا تھا جس کے بعد وہ ملک اور جموں و کشمیر میں کافی مقبول ہوئے تھے۔

شمالی کشمیر کے ضلع کپواڑہ سے تعلق رکھنے والے شاہ فیصل نے سرینگر کے سکمز بمنہ میڈیکل کالج سے ایم بی بی ایس کے بعد سول سروس امتحان میں اول پوزیشن حاصل کی تھی۔