کشمیر: ہاسٹل خالی کرنے کا سلسلہ جاری

ریاست جموں و کشمیر میں مزید سکیورٹی اہلکاروں کے اضافی تعیناتی اور حکومت کی جانب سے جاری حکم نامے کے سبب پوری ریاست میں تشویش کی لہر ہے۔

ریاست جموں و کشمیر میں نیشنل انسٹی ٹیوٹ آف ٹیکنالوجی حضرت بل سرینگر کے رجسٹرار کی طرف سے ایک نوٹیفیکیشن جاری کیا گیا ہے جس میں آج سے تمام تدریسی سرگرمیوں کو آئندہ ہدایت تک بند کرنے کا حکم دیا گیا ہے۔

اس حکمنامے میں انسٹی ٹیوٹ میں زیر تعلیم تمام ریاستی اور غیر ریاستی طلبہ کو ہاسٹل خالی کرنے کی ہدایت جاری کی گئی ہے اس حوالے سے این آئی ٹی کیمپس میں صبح چھ بجے سے مقامی طلبہ اپنے گھروں کی طرف روانہ ہورہے ہیں۔

وہیں غیر ریاستی طلبہ کے لیے سرکاری بسوں کا انتظام رکھا گیا ہے ۔

واضح رہے ڈپٹی کمشنر سرینگر شاہد چودھری نے این آئی ٹی حضرت بل سرینگر میں آج سے تدریسی سرگرمیاں معطل کرنے کی ایک نوٹیفیکیشن کی تردید کی تھی۔

شاہد چودھری نے اپنے ایک ٹویٹ بیان میں کہا تھا کہ انتظامیہ کی طرف سے اس قسم کی کوئی ہدایت جاری نہیں کی گئی ہے ۔

تاہم شاہد اقبال چودھری کے تردیدی بیان میں اب کوئی صداقت نہیں دیکھی جارہی ہے۔