ایجیک کے عہدیداروں کا سرینگر میں احتجاج

احتجاجی افراد نے ملازمین کو عید سے قبل ماہ اپریل و مئی کی تنخواہیں واگذار کرنے کا مطالبہ کیا۔

جموں وکشمیر ایمپلائز جوائنٹ ایکشن کمیٹی کے عہدیداروں نے پریس کالونی میں سرکاری ملازمین کے سروس ریکارڈ اور پے سسٹم کو کورونا وائرس اور فور جی موبائل انٹرنیٹ خدمات کی معطلی کے پیش نظر آن لائن کرنے کے عمل کو فی الحال موخر کرنے کے مطالبے کو لیکر علامتی احتجاج درج کیا۔

متذکرہ کمیٹی کے سکریٹری سجاد احمد پرے کہا کہ پانچ لاکھ ملازمین ماہ اپریل کے تنخواہ سے محروم ہیں کیونکہ ان کا سروس ڈاٹا آن لائن نہیں ہوسکا ہے۔

انہوں نے کہا کہ 'حکومت نے گذشتہ ماہ ایک حکمنامہ جاری کیا جس میں پانچ لاکھ ملازموں کے سروس ریکارڈ کو جے کے سی پی آئی ایس کی ویب سائٹ پر آن لائن کرنے کو کہا گیا لیکن یہاں ٹو جی موبائل انٹرنیٹ سروس جاری ہے اور کورونا وائرس کی وجہ سے ہمیں افرادی قوت کی قلت کا بھی سامنا ہے جس کی وجہ سے ہم اب تک صرف 33 فیصد ملازمین کا ہی ڈاٹا اپ لوڈ کر پائے ہیں۔'

موصوف سکریٹری نے کہا کہ سروس ریکارڈ اپ لوڈ نہ ہونے کی وجہ سے ملازمین ماہ اپریل کی تنخواہ سے محروم ہیں۔

انہوں نے کہا کہ ہماری حکومت سے اپیل ہے کہ موجودہ حالات کے پیش نظر سروس ریکارڈ آن لائن کرنے کے اس عمل کو موخر کیا جائے اور فی الوقت ملازمین کو سابقہ طریقہ کار کے مطابق ہی تنخواہیں واگذار کی جائیں۔

سجاد احمد نے کہا کہ' ہمارا مطالبہ ہے کہ ملازمین کو ماہ اپریل اور مئی کی تنخواہیں عید سے قبل ہی واگذار کی جائیں تاکہ انہیں مشکلات کا سامنا نہ کرنا پڑے۔'

اس علامتی احتجاج کی سربراہی ایمپلائز جوائنٹ ایکشن کمیٹی کے جنرل سکریٹری خورشید احمد بٹ کررہے تھے۔