کشمیر میں حالات پر امن ہیں تو سیاسی رہنما قید کیوں؟

جموں کے سابق سیول جج نے مرکزی حکومت کی تنقید کرتے ہوئے کہا ہے کہ اگر جموں و کشمیر میں حالات پر امن ہیں تو جموں وکشمیر کے تین سابق وزرائے اعلی کو نظر بند کیوں کیا گیا ہے؟۔

جموں کے سابق سیول جج مظفر اقبال خان نے کہا کہ مرکزی حکومت کی پوری کہانی غلط ہے۔

انہوں نے کہا 'جموں وکمشیر میں کہیں بھی پوری طرح سے انٹرنیٹ خدمات بحال نہیں کی گئی ہیں، جو ویب سائٹز حکومت کی طرف سے استعمال کرنے کو کہا گیا ہے، انہیں کوئی استعمال نہیں کرتا، جموں و کشمیر میں اب مہینوں اس حالت میں گزر گئے ہیں اور کب تک مرکز کشمیر کو اس حال میں رکھے گا؟۔

سابق جج نے کہا 'مرکز کی طرف سے ہر بار یہ کہہ کر ٹال دیا جاتا ہے کہ سکیورٹی صورتحال کی وجہ سے جموں و کشمیر میں یہ پابندیاں لگائی گئی ہیں'۔

انہوں نے کہا کہ 'جموں و کشمیر میں خراب حالات مرکز کی طرف سے پیدا کیے گئے ہیں، مرکزی حکومت نے دفعہ 370 کو منسوخ کیا اور خطے میں سکیورٹی فورسز کو تعینات کیا'۔

مظفر خان نے مزید کہا 'اگر جموں و کشمیر میں حالات پر امن ہیں تو حکومت کی طرف سے سابق وزرائے اعلی کو نظر بند کیوں رکھا گیا ہے۔

واضح رہےکہ 5اگست 2019 سے دفعہ 370 کی منسوخی کے بعد سے سابق ریاست جموں و کشمیر کے تین سابق وزرائے اعلی فاروق عبداللہ، عمر عبداللہ اور محبوبہ مفتی کو نظر بند کیا گیا ہے۔

سابق سیول جج نے الزام لگایا کہ 'مرکزی حکومت خطے میں نوجوانوں پر تشدد کر رہی ہے'۔

سابق ریاست جموں و کشمیر کو خصوصی درجہ دینے والے دفعہ 370 کو مرکز کی طرف سے پانچ اگست سنہ 2019 کو منسوخ کر دیا گیا تھا۔ جس کے بعد 31 اکتوبر کو جموں و کشمیر کو دو حصوں جموں و کشمیر اور لداخ میں تقسیم کر کے مرکز کے زیر انتظام علاقہ بنا دیا گیا ہے۔