کرناٹک: کشمیری طلباء کے لیے قانونی خدمات کا راستہ ہموار

ریاست کرناٹک میں ہبلی بار ایسوسی ایشن نے ملک سے غداری کے معاملے میں گرفتار کشمیری طلباء کی نمائندگی کے خلاف اپنی قرار داد واپس لے لی ہے۔

ہبلی بار ایسوسی ایشن نے کہا کہ 'جو وکلاء گرفتار کشمیری طلباء کے لیے اپنی قانون خدمات پیش کرنا چاہتے ہیں وہ ضمانت کی درخواست دائر کرنے کے لیے دھرود پرنسپل ڈسٹرکٹ کورٹ سے رجوع کرسکتے ہیں۔

اس سے قبل سیکنڈ جوائنٹ مجسٹریٹ فرسٹ کلاس (جے ایم ایف سی) عدالت نے تین طلباء، جن کی شناخت باسط عاشق صوفی (19 برس)، طالب ماجد (19 برس) اور عامر محی الدین (23 برس) کے نام سے ہوئی ہے، کو اس معاملے میں پوچھ تاچھ کے لیے 28 فروری تک پولیس تحویل میں بھیجا ہے۔

پولیس کے مطابق ان تینوں طلباء نے پلوامہ حملے کی پہلی برسی کے موقع پر ایک ویڈیو بنایا تھا جس میں وہ مبینہ طور پر 'پاکستان کی حمایت میں اور 'فری کشمیر' کے نعرے لگا رہے ہیں'۔

ویڈیو وائرل ہونے کے بعد پولیس نے تینوں طلباء کو گرفتار کیا تھا۔

واضح رہے کہ گزشتہ دنوں ان کشمیری طلباء کو ہبلی سب جیل سے بیلگام ہندالگا جیل منتقل کر دیا گیا تھا۔