وادی کشمیر میں برف باری کا سلسلہ جاری

وادی کشمیر کے ساتھ ساتھ ضلع اننت ناگ اور جنوبی کشمیر کے بیشتر حصوں میں تازہ برف باری کے بعد عام زندگی کافی متاثر ہوئی ہے۔ جبکہ دن کے درجہ حرارت میں نمایاں کمی آنے کے ساتھ ہی سردی میں شدت پیدا ہو گئی ہے۔

کشمیر میں گزشتہ شب سے تازہ برفباری کی وجہ سے عام زندگی مفلوج ہوکر رہ گئی ہے۔

جواہر ٹنل اور پیر پنچال پہاڑی رینج کے آر پارعلاقوں میں تازہ برف باری کے بعد جموں سرینگر قومی شاہراہ پر ٹریفک کی آمد و رفت بھی معطل ہو گئی ہے۔

حکام کے مطابق شاہراہ پر پھسلن پیدا ہونے کی وجہ سے احتیاطی طور پر یہ اقدام اٹھایا گیا ہے۔ تازہ برف باری کے بعد مغل روڈ کو بھی فی الحال بند کر دیا گیا ہے۔

ادھر کشمیر کے مشہور سیاحتی مقامات پہلگام، گلمرگ، کوکرناگ اور سنتھن ٹاپ میں بھی تازہ برف ہوئی ہے۔ جسکی وجہ سے لوگوں کو سخت مشکلات کا سامنا کرنا پڑ رہا ہے۔

تاہم سیاحتی شعبے سے منسلک افراد میں برف باری کے بعد تازہ امیدیں جاگ گئی ہیں۔

ان افراد کا کہنا ہے کہ تازہ برف باری سے یقینی طور پر یہاں کی سیاحتی صنعت پر تازہ اثرات مرتب ہونگے۔