کشمیر: عید الفطر کی نماز تاریخی جامع مسجد میں ہوگی

انجمن اوقاف جامع مسجد سری نگر کی اطلاع کے مطابق مسلسل موسلادھار بارشوں اور عیدگاہ میں نمی کے سبب عید الفطر کی نماز عیدگاہ سری نگر کے بجائے مرکزی جامع مسجد سری نگر میں صبح ساڑھے دس بجے ادا کی جائے گی۔

عید نماز سے قبل حسب روایت حریت کانفرنس (ع) چیئرمین و متحدہ مجلس علماء جموں وکشمیر کے امیر اعلیٰ میرواعظ مولوی عمر فاروق صبح نو بجے سے اپنے وعظ و تبلیغ میں پند و نصائح کے ساتھ ساتھ فلسفہ عید الفطر پر تفصیل سے روشنی ڈالیں گے۔

لوگوں سے جامع مسجد کے اجتماع میں شرکت کرکے وحدت اور اجتماعیت کا مظاہرہ کرنے کی تلقین کی گئی ہے۔ اس سلسلے میں نمازیوں کی سہولیات کے لئے انجمن اوقاف نے انتظامات کو حتمی شکل دی ہے۔

عید الفطر کی آمد پر اپنے عید پیغام میں میرواعظ عمر فاروق نے عالم اسلام سمیت اہلیان کشمیر کو دل کی عمیق گہرائیوں کے ساتھ عید کی مبارکباد پیش کرتے ہوئے کہا ہے کہ دراصل عید الفطر اپنے اندر ایک ایسا حیات آفریں پیغام رکھتی ہے جس سے عالم انسانیت کی بہار وابستہ ہے۔