غیر قانونی طور پر چل رہے پانچ کریشر سیزڈ

خطہ چناب کے ضلع ڈوڈہ میں ماحولیات کے لیے خطرہ بن رہے پانچ ایسے کریشر کو سرب مہر کر دیا ہے جو غیر قانونی طور دریائے چناب کے کنارے چل رہے تھے۔

مقامی لوگوں کی طرف سے بار بار عذرات پیش کرنے کے بعد عدالتی احکامات پر عمل کرتے ہوئے ضلع انتظامیہ ڈوڈہ نے دریائے چناب کے کناروں پر چل رہے پانچ پتھر توڑنے والے کریشروں کو سرب مہر کردیا ہے۔

یہ تمام تباہ کن کریشر مبینہ طور پر کچھ با اثر افراد نے غیر قانونی طور پر چلائے تھے۔ جو ماحول کو خراب کرنے کے علاوہ آبادی والے علاقوں میں بھی خطرات کا سبب بن رہے تھے۔

انتظامیہ کی جانب سے تمام مشینری سیل کردی گئی ہیں اور بجلی کی ترسیلی نظام کو بھی بند کر دیا ۔ انتظامیہ کے مطابق ڈوڈہ کی حدود میں آنے والے کریشرز مالکان کو بار بار کہا گیا تھا کہ وہ ضروری دستاویزات پیش کریں۔

کیونکہ پانچ کریشر مالکان کے پاس اِن کو چلانے کے لئے تمام دستاویزات موجود نہیں تھے۔

تحصیلدار ڈوڈہ شبیر احمد کے مطابق کریشر مالکان انتظامیہ کی طرف سے دئیے گئے وقت کے اندر دستاویزات پیش کرنے میں ناکام رہے ۔

جس کی وجہ سے اُن پر کارروائی کرکے کریشروں کو سیل کیا گیا ۔ ڈوڈہ میں ماحولیات کو بہتر بنانے کے لئے کام کرنے والی مختلف سماجی تنظیموں نے انتظامیہ کے اس اقدام کا خیرمقدم کیا ہے اور امید کی ہے کہ ماحولیات کو اور قدرتی نباتات کو تباہ کرنے والے اِن کریشروں کو دوبارہ چلانے کی اجازت نہیں ہوگی۔

انہوں نے مطالبہ کیا ہے کہ ڈوڈہ ضلع میں تمام کریشروں کی اسکریننگ کی جائے اور ان کی دستاویزات پر نظرثانی کی جائے۔