ڈاکٹرز نے بچائی حاملہ خاتون کی جان

مرکز کے زیر انتظام جموں و کشمیر کے ضلع بانڈی پورہ میں ڈاکٹرز نے ایک حاملہ خاتون کی جان بچا کر ایک مثال قائم کی ہے۔

بانڈی پورہ کے ضلع ہسپتال میں ڈاکٹرز نے کورونا وائرس سے متاثرہ حاملہ خاتون کا آپریشن کر کے نوزائیدہ بچہ اور ماں دونوں کی جان بچا لی۔

یہ جموں و کشمیر کے اندر اپنی نوعیت کا پہلا واقعہ ہے جو شمالی کشمیر کے بانڈی پورہ ضلع ہسپتال میں پیش آیا۔

ڈاکٹرز نے کووڈ 19 ٹیسٹ کی رپورٹ کا انتظار کیے بغیر درد زہ میں مبتلا ایک خاتون کا ایمرجنسی آپریشن کر کے زچہ و بچہ دونوں کی جان بچائی۔

حالاںکہ اس خاتون کا ٹیسٹ بعد میں مثبت آیا اور یوں ڈاکٹرز اور نیم طبی عملے نے اپنی جان کی پرواہ کیے بغیر دو لوگوں کی جان بچائی۔

کہا جارہا ہے کہ بانڈی پورہ کے تکیہ احمد شاہ نامی علاقے سے تعلق رکھنے والی حاملہ خاتون کو جب ہسپتال لایا گیا تو اس وقت ان کی اور بچہ کی حالت انتہائی خراب تھی اور انہیں سرینگر منتقل کرنا مشکل تھا۔

وہیں ایک اور پریشانی یہ بھی تھی کہ ڈاکٹروں کو اس حاملہ خاتون کے کووڈ 19 ٹیسٹ رپورٹ کے لیے دو گھنٹوں کا انتظار کرنا تھا۔

تاہم حاملہ خاتون کی حالت دیکھ کر ڈاکٹرز نے رپورٹ کا انتظار کیے بغیر ہی حاملہ خاتون کا آپریشن کر دیا۔

تاہم خاتون کا ٹیسٹ بعد میں مثبت آنے کے ساتھ ہی اُنہیں اور اُن کے بچے کے علاوہ آپریشن تھیٹر میں موجود عملے کو قرنطینہ مرکز میں منتقل کر دیا گیا ہے اور آپریشن تھیٹر کو دو دنوں کے لئے بند کرنے کے علاوہ پورے ہسپتال کو سینیٹائز کیا گیا ہے۔

خیال رہے کہ یہ خاتون چار سال بعد حمل سے ہوئی تھیں۔

بانڈی پورہ چیف میڈیکل افسر ڈاکٹر بشیر احمد خان نے ضلع ہسپتال کے عملے کو اس کامیابی کے لئے مبارک باد دی ہے۔