'انتخابات میں عوام کی بھر پور شرکت ہی ہم سب کی جیت ہے'

ای ٹی وی بھارت کے ساتھ بی جے پی کی سینیئر رہنما درخشاہ اندرابی نے خصوصی بات چیت کی۔

جموں و کشمیر میں پہلی مرتبہ منعقد کئے گئے ڈسٹرکٹ ڈیولپمنٹ کونسل کے انتخابات کے ووٹوں کی گنتی جاری ہے اور نتائج سامنے آنے سے یہ صاف طور عیاں ہوتا جارہا ہے کہ انتخابات میں ایک دوسرے کے مدمقابل بی جے پی اور گپکار اعلامیہ میں شامل پارٹیوں کے امیدوار ایک دوسرے سے کتنے ووٹوں سے سبقت بنائے ہوئے ہیں۔

ادھر نتائج ظاہر ہونے کے ساتھ ہی دیگر پارٹیوں کے علاہ بی جے پی کے رہنماؤں کا بھی ردعمل سامنے آنے لگا ہے۔ ای ٹی وی بھارت کے نمائندے نے جاری ووٹوں کی گنتی اور انتخابی عمل پر بی جے پی کی سینیئر رہنما درخشاہ اندرابی سے بات چیت کی تو انہوں نے اپنا درعمل ظاہر کرتے ہوئے کہا کہ جموں و کشمیر، بالخصوص وادیٔ کشمیر میں ڈی ڈی سی انتخابات میں لوگوں کی بھاری شرکت جمہوریت کی سب سے بڑی جیت ہے کیونکہ منعقد کئے گئے ان ڈی ڈی سی انتخابات کے دوران دہائیوں بعد ہر عمر کے ووٹرز نے بڑھ چڑھ کر حصہ لے کر جمہوری اداروں کو تقویت بخشی جو نہ صرف خوش آئند ہے بلکہ حوصلہ افزا بھی۔ اب لوگوں نے اپنا فیصلہ کسی کے حق میں دیا یا کسی کے حق میں نہیں، وہ ایک الگ بات ہے۔ انہوں نے کہا کہ انتخابات میں بغیر کسی دباؤ کے کھلے ذہن سے لوگوں نے جس طرح اپنی رائے کا اظہار کیا، وہ ہم سب کے لئے بڑی جیت ہے۔

درخشاہ اندرابی نے بات چیت کے دوران کہا کہ مرکزی حکومت کی جانب سے پہلی بار منعقد کئے گئے ان ڈی ڈی سی انتخابات کے ذریعے گاؤں دیہات کے بنیادی مسائل بہتر طور حل ہو سکتے ہیں اور منتخب نمائندے اپنے علاقے کو از خود ترقی کی اور لے جا سکتے ہیں۔

ایک سوال کے جواب میں بی جے پی کی سینیئر رہنما نے کہا کہ انتخابی مہم کے دوران جموں و کشمیر کے لوگوں نے جس کھلے دل و دماغ سے بی جے پی کا ساتھ دیا، امید ہے کہ اس جوش وجذبے کے ساتھ ان کے حق میں بھی فیصلہ آئے گا۔ انہوں نے کہا کہ جمہوریت میں ہر کسی شخص اور فرد کو اپنی رائے رکھنے کا حق حاصل ہے اور جو بھی کوئی رائے عوام نے اپنے ووٹ کے ذریعے رکھی ہوگی وہ ہمیں منظور ہوگی۔