بانڈی پورہ میں سی آر پی ایف اہلکار زخمی

شمالی کشمیر کے ضلع بانڈی پورہ کے پاپچن علاقے میں دیر رات کو ایک سی آر پی ایف کیمپ کے الرٹ سنتری نے مشتبہ نقل و حرکت دیکھنے کے بعد فائرنگ کر دی۔

جموں و کشمیر کے بانڈی پورہ ضلع میں گزشتہ دیر شب ایک سینٹرل ریزرو پولیس فورس (سی آر پی ایف) کا ایک اہلکار اس وقت زخمی ہوگیا جب کیمپ میں تعینات سنتری (گارڈ) نے مشکوک حرکت دیکھنے کے بعد گولیاں چلائیں۔

پولیس نے بتایا کہ ضلع بانڈی پورہ کے علاقے پاپچن کے ایک کیمپ میں سنتری کو رات کے وقت کچھ مشکوک حرکت نظر آئی جس کے بعد اس نے ہوا میں گولیاں چلائیں۔

ایک پولیس افسر نے بتایا کہ 'اس واقعے میں سی آر پی ایف کی تیسری بٹالین کا ایک کانسٹیبل وکاس کمار زخمی ہوا تھا۔'

پولیس افسر نے مزید بتایا کہ 'انہیں اسپتال منتقل کیا گیا جہاں ڈاکٹروں نے ان کی حالت مستحکم بتائی ہے۔ ہم اس کی صحیح تفصیلات معلوم کر رہے ہیں کہ اگر کانسٹیبل نے ہوا میں گولیاں چلائیں تو کانسٹیبل کیسے زخمی ہوا۔'