لاک ڈاؤن: ترال میں بیساکھی تقریب ملتوی

ملک بھر میں نافذ لاک ڈاؤن اور کورونا وائرس کے بڑھتے خطرات کے مد نظر جنوبی کشمیر کے ترال علاقے میں سکھ برادری نے امسال بیساکھی کی تقریبات ملتوی کرنے کا فیصلہ کیا ہے۔

ملک بھر کے ساتھ ساتھ وادی کشمیر میں سرکاری احکامات میں بھی کسی مذہبی یا سماجی تقریب کو منانے پر پابندی عائد ہے۔ سکھوں کا مذہبی تہوار بیساکھی 14 اپریل کو منایا جا رہا ہے۔

ترال بورڈنگ ہاوس میں بھی اس حوالے سے ہر سال ایک بڑی تقریب منعقد ہوتی تھی جس میں وادی کے اطراف واکناف سے ہزاروں سکھ عقیدت مند حاضر ہوتے تھے۔ تاہم امسال کورونا وائرس اور مسلسل لاک ڈاؤن کی وجہ سے اس تقریب کو ملتوی کیا گیا ہے۔

گوردوارہ پربندھک کمیٹی پلوامہ کے ایک سینئیر عہدیدار اجل سنگھ نے ای ٹی وی بھارت کو بتایا کہ' موجودہ صورتحال کو دیکھتے ہوئے یہ فیصلہ لیا گیا ہے کیونکہ موجودہ حالات میں ہمیں گھروں کے اندر رہ کر انتظامیہ کو تعاون فراہم کرنا چاہئے۔ '