Congress protest اسمارٹ میٹرز کے خلاف کانگریس کا جموں میں احتجاج

جموں کے شاہدی چوک میں واقع پارٹی ہیڈ کوارٹر کے سامنے کانگریس کارکنان اور عوام نے اسمارٹ میٹرز، مہنگائی، پراپرٹی ٹیکس سمیت دیگر اہم ایشوز کے خلاف زور دار احتجاج کیا۔ کانگریس کے حامیوں نے قبل از وقت اسمبلی انتخابات کرانے کا بھی مطالبہ کیا۔

جموں: مرکز کے زیر انتظام یوٹی جموں و کشمیر کے ضلع جموں میں پارٹی ہیڈ کوارٹر کے سامنے کانگریس کارکنان اور عوام نے اسمارٹ میٹرز، مہنگائی، پراپرٹی ٹیکس سمیت دیگر اہم ایشوز کے خلاف جم کر احتجاج کیا۔ کانگریس کے حامیوں نے قبل از وقت اسمبلی انتخابات کرانے کا بھی مطالبہ کیا۔ کانگریس کے درجنوں کارکنان نعرے بازی کرتے ہوئے سیکرٹریٹ کی طرف مارچ کرنے کی کوشش کی لیکن وہاں موجود پولیس نے انہیں آگے جانے سے روک دیا ۔پولیس کی کارروائی کے باوجود کانگریس کے حامیوں کا احتجاج جاری رہا۔اس درمیان مظاہرین اور پولیس اہلکاروں کے درمیان ہاتھا پائی ہوئی۔ خواتین سمیت کارکنوں کی بڑی تعداد پلے کارڈ اٹھا کر مرکزی حکومت اور یو ٹی انتظامیہ کے خلاف احتجاج کر رہی تھی۔

کانگریس خاتون لیڈر اور کارپوریٹر جموں میونسپل کارپوریشن اندو پوار نے ای ٹی وی بھارت کے ساتھ بات چیت کرتے ہوئے کہا کہ بی جے پی حکومت غریب اور عام لوگوں کو پریشان کر رہی ہے۔ مہنگائی کے دور میں لوگ بھاری ٹیکس ادا کرنے سے قاصر ہیں۔ ضروری اشیا کی قیمتیں آسمان کو چھو رہی ہیں۔ روزمرہ کے اخراجات پورے کرنا مشکل ہوتا جا رہا ہے۔ کانگریس عوام کی آواز کو مضبوطی سے بلند کرے گی۔ بی جے پی اور یو ٹی انتظامیہ کے غریب اور عوام مخالف فیصلوں کے خلاف لڑے گی۔