برفباری سے پیدا شدہ صورتحال سے نمٹنے میں انتظامیہ ناکام

سٹیزن کونسل نے کہا کہ 'سب ضلع ترال میں شدید برفباری سے پیدا شدہ صورتحال سے نمٹنے میں ترال انتظامیہ پوری طرح سے ناکام ہو چکا ہے۔'

سب ضلع ترال میں شدید برفباری سے پیدا شدہ صورتحال کا مقابلہ کرنے کے لیے ترال انتظامیہ پوری طرح ناکام ہو چکا ہے اور اب بھی کئی سڑکوں سے برف نہیں ہٹائی گئی ہے۔ ان خیالات کا اظہار رضاکار تنظیم سٹیزن کونسل ترال کے سربراہ فاروق احمد ترالی نے میڈیا سے گفتگو کرتے ہوئے کیا۔

انہوں نے کہا کہ گاؤں دیہات میں لوگوں کو سڑک رابطہ اور دیگر بنیادی سہولیات جیسے پانی اور بجلی کے بغیر ہی زندگی گزارنی پڑ رہی ہے وہ قابل افسوس ہے۔

فاروق ترالی نے الزام لگایا کہ جس طریقے سے انتظامیہ کو اس ہنگامی صورتحال سے نمٹنے کے لئے تیار ہونا چاہیے تھا ایسا نہیں دیکھا گیا اور برف باری کے بعد علاقے کی آبادی مفلوج ہو کر رہ گئی ہے۔

انہوں نے ترال انتظامیہ سے اپیل کی کہ وہ سڑکوں سے برف ہٹانے کے عمل میں سرعت لائے تاکہ عام لوگوں کو دشواریوں کا سامنا نہ کرنا پڑے۔