ترال میں اخلاص ویلفیئر ٹرسٹ کی جانب سے امراض قلب کے تعلق سے بیداری مہم

ضلع پلوامہ کے ترال میں واقع اخلاص ویلفئیر ٹرسٹ کی جانب سے حرکت قلب کی بیماریوں کو لے کر بیداری پروگرام کا اہتمام کیا گیا جس میں کثیر تعداد میں مقامی باشندوں نے شرکت کی۔

ترال:مرکز کے زیر انتظام یوٹی جموں و کشمیر کے ضلع پلوامہ کے ترال میں واقع اخلاص ویلفئیر ٹرسٹ کی جانب سے حرکت قلب کی بیماریوں کو لے کر بیداری پروگرام کا اہتمام کیا گیا جس میں کثیر تعداد میں مقامی باشندوں نے شرکت کی۔ وادی کشمیر میں سردیوں کے موسم میں حرکت قلب سے متعلق امراض و واقعات میں اضافہ درج کیا جاتا ہے جس کی وجہ سے ماہرین صحت لوگوں کو احتیاطی تدابیر اپنانے پر زور دیتے ہیں۔ اس بات کو مد نظر رکھتے ہوئے اخلاص ویلفیر سوسائیٹی ترال کی جانب سے آج کمسٹس اینڈ ڈسٹریبیوٹرس کے لیے کارڈیو پلمونری ریسیسیٹیشن (CRP) کے موضوع پر یک روزہ ورکشاپ منعقد ہوا۔ اس میں علاقے سے آئے ہوئے کمسٹس اینڈ ڈسٹریبیوٹرس نےشرکت کی۔

مذکورہ ورکشاپ کے دوران معروف معالج و مصنف ڈاکٹر نثار احمد بٹ ترالی نے مقررہ موضوع پر مفصل جانکاری فراہم کرتے ہوئے کہا کہ ہارٹ اٹیک کے وقت چند اہم کوششوں سے انسان کی جان بچائی جا سکتی ہے۔ انہوں نے اس دوران کمسٹس اینڈ ڈسٹریبیوٹرس کو بھی اس حوالے سے تربیت دی۔ پروگرام میں شریک لوگوں نے ڈاکٹر نثار کے عوامی خدمات کی زبردست سراہنا کی۔ میڈیا کے ساتھ بات کرتے ہوئے ڈاکٹر نسار احمد بٹ نے بتایا کہ حرکت قلب ہونے کی صورت میں اگر CRP پر عمل کیا جائے تو بہت ساری زندگیوں کو بچایا جا سکتا ہے۔