جموں: دفعہ 370 کی منسوخی کے خلاف کانگریس کا احتجاج

مرکزی حکومت کی جانب سے دفعہ 370 کو ہٹانے اور ریاست کو دو حصوں میں منقسم کرنے کے خلاف آج خطہ جموں میں کانگریس کارکنوں نے شدید احتجاج کیا۔

جموں کے شہیدی چوک پر واقع کانگریس کے دفتر کے باہر آج یوتھ کانگریس کے کارکنوں نے زبردست احتجاج کیا اور مرکزی حکومت کے خلاف جم کر نعرے بازی کی۔

کارکنوں نے ریاست کا درجہ واپس دو اور تانا شاہی نہیں چلے گی جیسے نعرے بھی لگائے۔ کارکنوں نے جوں ہی دفتر سے آگے بڑھنے کی کوشش کی تو پولیس فوراً جائے وقوع پر پہنچ کر انہیں حراست میں لیا۔ کانگریس کے ریاستی سکریٹری شاہنواز چودھری اور یوتھ کانگریس کے ریاستی صدر آر ایس چب کو پولیس کی بھاری نفری نے حراست میں لیا۔

واضح رہے کہ 5 اگست کو مرکزی حکومت کی جانب سے جموں و کشمیر کو خصوصی حیثیت فراہم کرنے والی دفعہ 370 اور 35 اے کو ختم کر کے ریاست کو دو حصوں میں تقسیم کیا۔ حکام نے ریاست کی آئینی حیثیت ختم کرنے سے قبل ریاست کے اکثر ہند نواز رہنماؤں کو حراست میں لیا اور انٹرنیٹ اور تمام مواصلاتی رابطے کو بند کرکے غیر اعلانیہ کرفیو نافذ کیا گیا۔