گاڑی کھائی میں گرنے سے تین افراد کی موت

ہماچل پردیش میں ضلع شملہ کے چیپال سب ڈویژن میں جکنی پل روڈ پر بولیرو کیمپ گاڑی کے گہری کھائی میں گرنے کے بعد تین افراد کی موت ہو گئی اور چار زخمی ہوگئے۔

پولیس نے آج یہاں بتایا کہ دیر شام پیش آئے اس حادثے کے وقت سات افراد گاڑی میں تھے۔ یہ سبھی ایک ہی کنبے سے تعلق رکھتے ہیں ۔ حادثہ اتنا شدید تھا کہ تین افراد موقع پر ہی دم توڑ گئے اور دو دیگر افراد شدید زخمی بتائے جا رہے ہیں جبکہ دو افراد کو معمولی چوٹیں آئی ہیں ۔ مقامی لوگوں اور انتظامیہ کی مدد سے سب کو سول اسپتال چیپال پہنچایا گیا ہے ۔
پولیس نے حادثے میں ہلاک ہونے والوں کی شناخت راہل، سنیل اور انکش کے طور پر کی ہے۔ شدید زخمیوں کو ابتدائی طبی امداد کے بعد آئی جی ایم سی شملہ منتقل کر دیا گیا۔ حادثے کی وجوہات کا پتہ نہیں چل سکا ہے۔
حادثے کی اطلاع ملنے پر ایس ڈی ایم چیپال انل چوہان اسپتال پہنچے اور ہلاک شدگان کے اہل خانہ کو 10- 10 ہزار اور زخمیوں کو پانچ ہزار روپے کی فوری طور پر امداد فراہم کی۔
ڈپٹی سپرنٹنڈنٹ پولیس ورون پٹیال نے معاملے کی تصدیق کرتے ہوئے بتایا کہ پولیس نے معاملہ درج کر لیا ہے۔ پوسٹ مارٹم کے بعد لاشوں کو لواحقین کے حوالے کر دیا گیا ہے۔ پولیس حادثے کی وجوہات کی جانچ کر رہی ہے۔