میوات: پانی نہیں ملنے پر سڑک جام کرنے کا انتباہ

نوح کے کسانوں کا کہنا ہے کہ ایسا پہلی بار ہو رہا ہے کہ پانی کی فراہمی میں اس قدر جانب داری برتی جا رہی ہے لیکن اب کسان خاموش نہیں بیٹھے گا اگر انھیں 24 گھنٹے تک پانی نہیں ملتا تو اب سڑک جام کرکے احتجاج کیا جائے گا۔

ہریانہ کے حلقۂ اسمبلی نوح سے رکن اسمبلی اور ڈپٹی اپوزیشن رہنما آفتاب احمد درجنوں کسانوں کے ساتھ سوکھی نہر پہنچے اور ریاستی حکومت کو سخت انتباہ دیا کہ علاقے کے کسان حکومت کی جانب سے انھیں پانی فراہم نہ کیے جانے کے اقدام سے سخت ناراض ہیں۔

رکن اسمبلی نے مزید کہا کہ کوٹلہ پمپ ہاوس آکیڑہ ڈرین ایک عرصے سے سوکھی پڑی ہے، گزشتہ ہفتے دیے گئے انتباہ کے بعد ایک دن بمشکل پانی آیا اور پھر واپس پانی روک دیا گیا۔دوسری طرف گیہوں اور سرسوں کی فصل بوائی کے لیے کسانوں کو پانی کی سخت ضرورت ہے۔

آفتاب احمد نے بی جے پی حکومت پر زبردست نکتہ چینی کرتے ہوئے کہا کہ حکومت میوات کے ساتھ سراسر جانبداری سے کام لے رہی ہے۔میوات کے تینوں رکن اسمبلی کانگریس سے ہیں اس لیے میوات کے کسانوں کو تکلیف دی جا رہی ہے۔

انہوں نے کہا کہ بی جے پی کے امیدوار رہے سابق رکن اسمبلی چودھری ذاکر حسین بھی پانی رکوانے میں حکومت کا ساتھ دے رہے ہیں جبکہ عوام بنا پانی کے پریشان ہے۔

علاقے کسانوں کا کہنا ہے کہ ایسا پہلی بار ہو رہا ہے کہ پانی کی فراہمی میں اس قدر جانب داری برتی جا رہی ہے لیکن اب کسان خاموش نہیں بیٹھیں گے اگر انھیں 24 گھنٹے تک پانی نہیں ملا تو اب وہ سڑک پر اتر کر احتجاج کریں گے۔

کسانوں نے حکومت کو انتباہ دیا ہے کہ اگر پانی کی ضرورت کو پورا کرنے کے لیے انھیں راجستھان جانے والا پانی بھی روکنا پڑے تو وہ اس سے پیچھے نہیں ہٹیں گے۔