ہریانہ: نجی نیوز چینل کے خلاف سلام الدین ایڈووکیٹ کی جانب سے درج کرائے گئے معاملے پر آج پنجاب اینڈ ہریانہ ہائی کورٹ نے سماعت کرتے ہوئے نوح ایس پی کو دو ماہ کے اندر کارروائی کرنے کے احکامات جاری کئے ہیں۔ اطلاعات کے مطابق گزشتہ دنوں نجی نیوز چینل کے ایڈیٹر نے اپنے ٹی وی پروگرام میں نوکرشاہی نظام پر سنگین الزامات عائد کرتے ہوئے مسلمانوں پر الزام عائد کیا تھا کہ 'آئی اے ایس اور آئی پی ایس میں مسلمان زیادہ تعداد میں کامیاب ہوکر جہاد کرنے کی تیاری کر رہے ہیں۔'
انہوں نے اسی شو میں جامعہ ملیہ اسلامیہ پر سنگین الزامات بھی عائد کئے تھے۔ جس کے بعد میوات کے متعدد تھانوں میں مذکورہ نیوز چینل کے خلاف شکایت کی گئی تھی جس پر عدالت نے آج سماعت کرتے ہوئے کارروائی کرنے کا حکم دیا ہے۔
سماعت کے دوران درخواست گزار کے وکیل تعلیم حسین نے عدالت سے کہا کہ سیکولرازم اور کثرت میں وحدت اس ملک کا ورثہ ہے۔ جو لوگ اس کے خلاف کام کر رہے ہیں وہ آئین کے خلاف کام کر رہے ہیں۔ عدالت نے جواب دیتے ہوئے کہا کہ عدالتیں بھی سیکولر ہیں۔ اس طرح عدالت نے نوح میوات کے ایس پی کو دو ماہ کے اندر اندر کارروائی کرنے کے احکامات جاری کئے ہیں۔