Nuh VHP Yatra اجازت نہ ملنے کے باجود ہندو تنظیمیں نوح میں یاترا نکالنے پر بضد، پولیس الرٹ

ہریانہ کے مسلم اکثریتی علاقے نوح میں پولیس انتظامیہ کی جانب سے اجازت نہ ملنے کے باوجود ہندو تنظیمیں برج منڈل یاترا نکالنے پر بضد ہیں۔ یاترا نکالنے پیش نظر کسی بھی قسم کی ہنگامی صورتحال سے نمٹنے کے لئے نوح میں چپے چپے پر پولیس فورس اور نیم فوجی اہلکاروں کی تعیناتی عمل میں لائی گئی ہے۔ ضلع سرسا میں پولیس کی دو اضافی کمپنیاں تعینات کی گئی ہیں۔ Haryana Nuh Violence Update

سرسا: ہریانہ کے مسلم اکثریتی علاقے نوح میں ہندو تنظیموں کی جانب سے یاترا نکالنے کے اعلان کے بعد ہریانہ حکومت کی جانب سے اجازت نہ دینے کے باوجود کسی بھی قسم کی ہنگامی صورتحال سے نمٹنے اور قانون کو برقرار رکھنے کے لئے ضلع سرسا میں پولیس کی دو اضافی کمپنیاں تعینات کی گئی ہیں۔ یہ کمپنیاں چوبیس گھنٹے 'الرٹ موڈ' پر رہیں گی۔ پولیس سپرنٹنڈنٹ وکرانت بھوشن کی موجودگی میں پولس لائن میں تعینات دو پولس کمپنیوں کی ریہرسل کی گئی اور ضروری ہدایات دی گئیں۔ ایمرجنسی کی صورت میں یہ کمپنیاں سرسا، ڈبوالی، ایلن آباد وغیرہ علاقوں میں خدمات فراہم کریں گی۔ اس موقع پر ڈی ایس پی جگت سنگھ بھی موجود تھے۔

وکرانت بھوشن نے کہا کہ ہماری دونوں کمپنیاں ضلع میں کسی بھی قسم کی ہنگامی صورتحال سے نمٹنے کے لیے ہمیشہ ضلع میں تعینات رہیں گی۔ انہیں ہر قسم کے حالات سے نمٹنے کے لیے ضروری تربیت دی جا رہی ہے۔ ڈی ایس پی ہیڈ کوارٹر عجائب سنگھ کی قیادت میں پولیس اہلکاروں کو تربیت دی جا رہی ہے۔

پولیس سپرنٹنڈنٹ نے کہا کہ کسانوں کی تحریک، سڑک جام، ملازمین کی تنظیموں کے احتجاج، سیاسی پارٹیوں کے مظاہرے یہاں ہوتے رہتے ہیں، جس میں بعض اوقات حالات انتہائی نازک ہو جاتے ہیں۔پولیس سپرنٹنڈنٹ نے کہا کہ اس طرح کے حالات سے نمٹنے کے لیے یہ کمپنی فوری طور پر موقع پر بھیجی جائے گی جو امن و امان برقرار رکھنے میں مددگار ثابت ہوگا۔ انہوں نے کہا کہ ان کمپنیوں میں تعینات پولیس اہلکاروں کی مسلسل ریہرسل کرائی جائے گی اور انہیں جسمانی اور ذہنی طور پر مکمل تربیت دی جائے گی۔ پولیس سپرنٹنڈنٹ نے کہا کہ ضلع کی ان پولیس کمپنیوں کی باقاعدگی سے ریہرسل کی جائے گی تاکہ وہ ہمیشہ تیار رہیں۔ ہر پولیس کمپنی میں 107-107 پولیس اہلکار تعینات کیے گئے ہیں۔

بھوشن نے بتایا کہ پولیس ہمیشہ عوام کی حفاظت کے لیے تعینات رہتی ہے۔ عام حالات میں پولیس عوام کی حفاظت کے ساتھ ساتھ ٹریفک مینجمنٹ، گشت، جرائم پیشہ افراد کی گرفتاری جیسے کام کرتی ہے لیکن کسی آفت کی صورت میں پولیس کا کام مزید پیچیدہ ہو جاتا ہے۔ پولیس سپرنٹنڈنٹ نے کہا کہ ایسی صورتحال میں امن و امان کے ساتھ ساتھ امن برقرار رکھنے کی ذمہ داری بھی پولیس پر ہوگی۔

انہوں نے کہا کہ کسی بھی ناگہانی آفت کی صورت میں ہر پولیس اہلکار کا زیادہ حساس ہونا ضروری ہو جاتا ہے۔ کئی بار پولیس کو غیر معمولی صورت حال کا سامنا کرنا پڑتا ہے، ایسے میں آپ کو اپنے ساتھی اہلکاروں کے ساتھ ہم آہنگی کر کے حالات کو کنٹرول کرنا پڑتا ہے۔ صورتحال جتنی نازک ہوگی آپ پر اتنا ہی زیادہ ذہنی دباؤ ہوگا۔ ایسی صورتحال میں آپ کو مزید صبر سے کام لینا ہوگا۔سپرنٹنڈنٹ آف پولیس نے اس موقع پر موجود پولیس اہلکاروں سے کہا کہ وہ عام لوگوں کے ساتھ دوستانہ رویہ رکھیں اور ان سے تعاون حاصل کریں اور قانون کو ہاتھ میں لینے والے سماج دشمن عناصر سے سختی سے نمٹیں۔

یو این آئی