میوات کے کسانوں نے بھی نکالی ٹریکٹر ریلی

یوم جمہوریہ کے موقع پر آج ملک بھر میں کسانوں کی طرف سے ٹریکٹر پریڈ کا اہتمام کیا گیا تھا۔ اسی ضمن میں میوات کے کسانوں نے بھی ٹریکٹر ریلی نکالی۔

میوات میں کسانوں نے بڑے پیمانے پر ٹریکٹر ریلی نکالی۔ صبح 9:58 بجے پرچم کشائی کرنے کے بعد سنہیڑا بارڈر سے کسان ہونہانہ شہر، پنگواں شکراوہ ہوتے ہوئے قریب 50 کلومیٹر لمبی ٹریکٹر پریڈ کا اہتمام کیا۔

پریڈ کے بعد واپس کسان بارڈر پر پہنچے اور حکومت کے خلاف زور دار نعرے بازی کی۔

اس موقع پر رشید احمد ایڈوکیٹ نے کہا کہ حکومت کو اس ٹریکٹر ریلی کے ذریعہ واضح پیغام دیا گیا ہے کہ حکومت تینوں زرعی قوانین کو واپس لے اور ایم ایس پی کی گارنٹی دے۔

انہوں نے کہا کہ یوم جمہوریہ کے موقع پر کسانوں کی طرف سے یہ محض ایک جھانکی ہے، ابھی پوری فلم باقی ہے۔[

ٹریکٹر پریڈ سے حکومت یہ بھی جان لے کہ جمہوریت میں ہمیشہ عوام کی بالادستی ہوتی ہے۔ حکومت عوام سے بنتی ہے۔

انہوں نے کہا کہ ہم نے جہاں انتظامیہ سے اجازت لی تھی وہیں، یہ ریلی مکمل طور پر پُرامدن رہی۔

کسانوں کی حمایت میں جے پور سے ہریانہ پہنچے سابق فوجی محمد شعیب خان نے کہا کہ ہم کسانوں کے ہی بیٹے ہیں۔ ہم نے شاہجہاں پور بارڈر پر بھی کسانوں کی قیادت کی تاکہ پولس اور عوام متصادم نا ہوں۔ اس حکومت کو ہر حال میں یہ قوانیں واپس لینے ہوں گے۔