گجرات میں لاک ڈاؤن کی وجہ سے تجارت سمیت اقتصادی سرگرمیاں بند رہیں جس سے گجرات حکومت کو ہزاروں کروڑوں روپے کا نقصان ہوا ہے۔ ایسے میں گجرات حکومت نے سرکاری آمدنی کو بڑھانے کے لیے پیٹرول اور ڈیزل کی قیمتوں میں 2 روپے فی لیٹر کا اضافہ کرنے کا فیصلہ کیا ہے۔ آج رات بارہ بجے سے نئی قیمتوں کو عمل میں لایا جائے گا۔
پیٹرول ڈیزل کی نئی قیمتوں میں اضافہ ہونے کے بعد احمدآباد میں پیٹرول کی قیمت 73.96 روپے ہوجائے گی اور ڈیزل کی قیمت 72.21 روپے ہوگی۔
اس تعلق سے گجرات کے نائب وزیر اعلی نتن پٹیل نے بتایا کہ کورونا قہر کی وجہ سے وزیراعظم نریندرمودی نے 2 ماہ تک لاک ڈاؤن نافذ کیا جس کی وجہ سے تمام تجارتی سرگرمیاں بند تھیں۔ اس دوران جی ایس ٹی کی آمدنی بہت کم ہوگئی۔ ریاستوں کے اپنے محصولات جیسے پیٹرول اور گیس کی آمدنی میں کمی ہوئی۔ سرکاری آمدنی میں کمی کے باوجود پانچ لاکھ سے زائد سرکاری ملازمین کو تنحواہ دی گئی، آمدنی کم ہونے کے باوجود بھی تمام اسکمیں میں جاری رہیں۔
انہوں نے مزید کہا کہ کورونا کی وجہ سے سب سے زیادہ نقصان ریاستی حکومت کو جھیلنا پڑا۔ کورونا کے علاج کے لیے ہر ضلع میں کووڈ ہسپتال شروع کیا گیا، اس میں داخل ہونے والے مریضوں کے رہنے اور کھانے پینے کا خرچ بھی گجرات سرکار نے اٹھایا۔
انہوں نے بتایا کہ ریاست میں سینیٹائزیشن کی سرگرمیوں کے لیے مشینیں اور ملازمین کا خرچ بھی اٹھایا گیا۔ کورونا کی وجہ سے جی ایس ٹی میں بہت زیادہ کمی درج کی گئی اس کی بھرپائی کے لیے پیٹرول ڈیزل کی قیمتوں میں 2 روپے فی لیٹر کا اضافہ کیا جائے گا۔
