احمدآباد سمیت ریاست کے بیشتر علاقوں میں آج موسلادھار بارش ہونے کا امکان

گجرات میں گزشتہ ہفتے شدید بارش ہوئی تھی لیکن گزشتہ کئی دنوں سے گجرات میں بارش تھم گئی ہے۔ جس کی وجہ سے لوگوں کو ناقابل برداشت گرمی جھیلنی پڑ رہی ہے۔ لیکن اب محکمہ موسمیات نے احمدآباد سمیت گجرات کے کئی علاقوں میں بارش ہونے کی پیشین گوئی کی ہے۔

محکمہ موسمیات نے آئندہ چار دنوں کے دوران گجرات کے کچھ حصوں میں موسلا دھار بارش ہونے کی پیشین گوئی کی ہے۔ گجرات کے بیشتر حصوں میں گزشتہ دنوں سے کالے بادل چھائے ہوئے ہیں لیکن بارش نہیں ہو رہی ہے ایسے میں لوگوں کو شدید گرمی کی وجہ سے پریشانی ہو رہی ہے۔

دراصل سائکلونک سرکولیشن خلیج بنگال اور اڈیشہ میں پیدا ہوگیا ہے۔ ایسے میں 16 جولائی تک گجرات میں لو پریشر بننے کے بعد کم دباؤ کے ساتھ ساتھ یہ سرکولیشن بن جائے گا۔

لہذا ریاست میں 16 سے 18 جولائی کے درمیان بھاری بارش ہونے کا امکان ہے۔ اس دوران خاص طور سے احمدآباد میں 1.5 انچ سے پانچ انچ بارش ہونے پیشین گوئی کی گئی ہے جبکہ سوراشٹر اور جنوبی گجرات میں 8 سے 10 انچ بارش ہونے کی پیشن گوئی کی گئی ہے۔

واضح رہے کہ گجرات میں مون سون کا سیزن شروع ہوچکا ہے لیکن ابھی تک ویسا مون سون کا ماحول نہیں بنا ہے لیکن اب گجرات میں آج سے بارش شروع ہونے سے لوگوں کو گرمی سے راحت کی امید ہے۔