احمدآباد: گجرات سے حج کے لیے جانے والے عازمین حج اس سال حج پالیسی اور اضافی رقم کی وجہ سے کافی پریشان حال ہیں۔ ریاست گجرات سے اس سال 10 ہزار کے قریب عازمین حج سفر بیت اللہ کے لیے روانہ ہوں گے لیکن ان میں سے بہت سے لوگوں نے آخری قسط اب تک نہیں جمع کرائی ہے کیوں نے گجرات سے ممبئی کے مقابلے 68 ہزار روپے زیادہ ادا کرنا پڑ رہا ہے۔ اضافی فیس وصولی کو لے کر ریاست کے عازمین حج نے گجرات ہائی کورٹ کا دروازہ کھٹکھٹایا۔ عازمین حج نے عدالت سے اس معاملے میں جلد سے جلد سماعت کی التجا کی لیکن گجرات ہائی کورٹ نے فوری سماعت کرنے سے انکار کردیا۔ اس سے عازمین حج کی پریشانی بڑھ گئی ہے۔
ایڈووکیٹ شمشاد خان پٹھان نے کہا کہ ریاست گجرات سے جو لوگ سفر بیت اللہ پر جا رہے ہیں ان کے لیے آج قسط بھرنے کا آخری دن ہے۔ انہیں 68 ہزار سے زائد اضافی رقم بھرنی پڑ رہی ہے۔ اس کے لیے ہم گجرات حج کمیٹی، حج کمیٹی آف انڈیا اور منسٹری آف مینارٹی افیئرز سبھی کو درخواست دی گئی ہے کہ احمدآباد سے سفر حج پر جانے والے حاجیوں سے جو 68 ہزار روپیے زیادہ لیے جا رہے ہیں اسے کم کیا جائے۔