گاندربل: تین سالہ بچی کی لاش برآمد

مرکز کے زیر انتظام جموں و کشمیر کے ضلع گاندربل کے ززنہ فروٹ منڈی کے قریب اتوار کی شام ایک خونخوار تیندوا نمودار ہوا اور ایک تین سالہ بچی کو اٹھا لے گیا۔ جس کے بعد بچی کی لاش ایک کھیت سے برآمد کی گئی۔

مقامی لوگوں کے مطابق گاندربل کے رہائشی شبیر احمد بھٹ کی بیٹی ماہیہ شبیر اپنی دادی کے ساتھ تھی، اچانک خونخوار تیندوا نمودار ہوا اور بچی کو اٹھا لے گیا۔

اس واقعہ کے فورا بعد ہی محکمہ وائلڈ لائف کے عہدیداروں، پولیس اور مقامی لوگوں نے بچی کا سراغ لگانے کے لئے سرچ آپریشن شروع کر دیا۔ انہوں نے بتایا کہ بہت دیر بعد بچی کی لاش ایک کھیت سے برآمد کی گئی۔

پولیس چوکی شادی پورہ کے آفیسر گلزار احمد نے واقعے کی تصدیق کرتے ہوئے بتایا کہ بچی کی لاش قریبی کھیت میں ملی ہے، جہاں سے اسے تیندوا لے گیا تھا۔

اس واقعہ کے بعد علاقے میں غم کا ماحول ہے اور محکمہ وایلڈ لایف نے تیندوے کو پکڑنے کے لئے جھال بچھا دیا ہے، تاکہ تیندوا مزید لوگوں پر حملہ نہ کر سکے.

غور طلب ہے کہ اس علاقے میں ہزاروں کنال اراضی پر میوہ کے باغات ہیں، جس کی وجہ سے یہاں گھنے جنگل ہیں۔