ڈی سی گاندربل کی عوام سے عید کے موقع پر کووڈ ایس او پیز پر عمل کرنے کی تلقین

ڈی سی گاندربل نے عوام سے عید الاضحی کے موقع پر کووڈ ایس او پیز پر سختی سے عمل کرنے کی تلقین کرتے ہوئے نماز عید بڑی خانقاہوں اور عیدگاہوں کے بجائے مقامی مساجد میں ادا کرنے کی اپیل کی۔

ڈپٹی کمشنر گاندربل کریتکا جیوتی سینا نے گاندربل کے لوگوں سے عالمی وبا کورونا وائرس کے پھیلائو کو روکنے کے لیے وضع کیے گئے ایس او پیز پر سختی سے عمل کرنے کی تلقین کی۔

انہوں نے کہا کہ انتظامیہ کی جانب سے عید کی نماز کے بڑے اجتماعات پر پابندی عائد کیے جانے کے سبب لوگوں کو مقامی مساجد میں سماجی فاصلہ برقرار رکھتے ہوئے عید کی نماز ادا کرنے کی اجازت دی جائے گی۔

ڈی سی گاندربل نے کہا کہ عوام کی بہبودی کے لیے ہی عید نماز کے بڑے اجتماعات پر پابندی عائد کی گئی ہے۔

انہوں نے عوام کو عید کی پیشگی مبارکباد دیتے ہوئے بازاروں میں بھیڑ بھاڑ جمع کرنے سے پرہیز کرنے کی بھی ہدایت دی۔

انہوں نے مزید کہا کہ گزشتہ ہفتہ کے مانند سونا مرگ اور مانسبل پارک کو ہفتہ اور اتوار کو سیاحوں کے لیے بند کر دیا گیا ہے تاہم صرف ان ہی سیاحوں کو ان مقامات پر جانے کی اجازت ہوگی جنہوں نے پیشگی ہوٹل بکنگ کی ہوگی۔