Militant Module Busted in Doda: ڈوڈہ میں عسکریت پسند تنظیم لشکر طیبہ کا ماڈیول تباہ

جموں و کشمیر پولیس نے ڈوڈہ ضلع میں لشکر طیبہ عسکریت پسند تنظیم کا ماڈیول کا پردہ فاش کرنے کا دعوی کیا ہے۔ پولیس نے اس سلسے میں ایک شخص کو گرفتار کر لیا ہے۔ ان کے گھر سے دھماکہ خیز مواد، ایک موبائل اور کچھ قابل اعتراض مواد بر آمد کیا گیا۔ Militant Module Busted in Doda

ڈوڈہ: جموں و کشمیر پولیس نے صوبہ جموں کے ضلع ڈوڈہ میں لشکر طیبہ کے ایک ماڈیول کو تباہ کرنے کا دعویٰ کیا ہے۔ پولیس کے ایک ترجمان نے تفصیلات فراہم کرتے ہوئے اپنے ایک بیان میں کہا کہ مصدقہ اطلاع موصول ہونے پر ڈوڈہ پولیس، فوج کی 10 آر آر اور بی ایس ایف کی 33 بٹالین کی ایک مشترکہ ٹیم نے پیر کے روز کاشتی گڑھ ڈوڈہ کو محاصرے میں لے کر تلاشی آپریشن شروع کر دیا۔

انہوں نے کہا کہ تلاشی آپریشن کے دوران سیکورٹی فورسز نے ارشاد احمد ولد محمد یوسف ساکن دھندال کاشتی گڑھ نام کے ایک مشکوک شخص کے مکان سے دھماکہ خیز مواد، ایک موبائل اور کچھ قابل اعتراض مواد بر آمد کیا۔ ان کا کہنا تھا کہ اس سلسلے میں پولیس اسٹیشن ڈوڈہ میں ایک کیس درج کر کے مزید تحقیقات شروع کی گئی ہیں۔

بیان میں مزید کہا گیا کہ اودھم پور پولیس نے لشکر طیبہ نامی جنگجو تنظیم سے وابستہ عسکریت پسند محمد امین عرف خبیب جو پاکستان سے آپریٹ کر رہا ہے، کی طرف سے چلائے جانے والے ایک اور ماڈیول کو حال ہی میں تباہ کیا۔ بیان کے مطابق خبیب وادی چناب میں ملی ٹنسی کو زندہ کرنے کے لئے کوشاں ہے اور وہ اس کے لئے مقامی نوجوانوں کو اپنے جال میں پھنسانے کی کوششیں کر رہا تاکہ وہ جموں صوبے میں حملے انجام دے سکیں۔

( یو این آئی)