ڈوڈہ: ٹھاٹھری میں وسیم رضوی کے خلاف احتجاج

پہاڑی ضلع ڈوڈہ کے ٹھاٹھری میں مسلم طبقہ سے وابستہ لوگوں نے وسیم رضوی کے خلاف احتجاج کیا۔

جموں و کشمیر کے پہاڑی ضلع ڈوڈہ کے سب ڈویژن ٹھاٹھری میں نماز جمعہ کے بعد وسیم رضوی کے خلاف احتجاج کرتے ہوئے لوگوں نے اسکے خلاف کڑی کارروائی کیے جانے کا مطالبہ کیا۔

احتجاج کر رہے لوگوں نے وسیم رضوی کے خلاف قانونی کارروائی کیے جانے کا مطالبہ کیا، انہوں نے کہا: ’’وسیم رضوی جیسے شر پسند عناصر کے خلاف حکومت ٹھوس کارروائی کرے جو بار بار مسلمانوں کے جذبات کو مجروح کر رہے ہیں۔‘‘

احتجاج میں شامل ٹھاٹھری کی جامع مسجد کے امام و خطیب نے میڈیا سے بات کرتے ہوئے کہا کہ ’’ایسے شر پسند عناصر کے خلاف سخت کارروائی ناگزیر ہے کیونکہ اس طرح کے مجرمانہ عمل سے نہ صرف مسلمانوں کے جذبات مجروح ہو رہے ہیں بلکہ مذہبی رواداری کو بھی زک پہنچتا ہے۔‘‘

انہوں نے وسیم رضوی کے قرآن پاک کی چند آیات سے متعلق دائر کی گئی عرضی کی مذمت کرتے ہوئے عدلیہ کی جانب سے عرضی کو مسترد کیے جانے کی امید ظاہر کی۔