'پندرہ دسمبر نہیں بھولیں گے'

جامعہ ملیہ اسلامیہ میں 15 دسمبر 2019 کی رات جس طرح پولیس نے مبینہ زیادتی کی تھی اور اس میں درجنوں طلبہ و طالبات زخمی ہوئے تھے، اسے سیاہ دن کے نام سے یاد کیا جارہا ہے۔

ای ٹی وی بھارت کے نمائندے نے جامعہ ملیہ اسلامیہ کے طلباء سے 15 دسمبر کو پولیس کی مبینہ زیادتی کے بارے میں بات کی جس میں انہوں نے کہا کہ ہم وہ دن کبھی نہیں بھولیں گے جب ہماری یونیورسٹی میں پولیس نے بے رحمی سے ہمیں پیٹا تھا۔

جامعہ ملیہ اسلامیہ کے طالب علم راہی نے بتایا کہ 'جمعرات کے روز جامعہ پر پولیس بربریت کا ایک مہینہ مکمل ہونے والا ہے، اسی کی یادگار کے لیے یہاں ایک علامتی پتلا لگا ہوا ہے، جس کے ذریعے ہم یہ پیغام دینا چاہتے ہیں کہ ہم وہ دن(15 دسمبر) نہیں بھولیں گے۔

واضح رہے کہ 15 دسمبر سنہ 2019 کو شہریت ترمیمی قانون کے خلاف مظاہرے کے بعد دہلی پولیس نے جامعہ کیمپس میں گھس کر طلباء کو بری طرح پیٹا تھا جس میں متعدد طلبا زخمی ہوئے تھے۔

پولیس کی اس زیادتی کے خلاف ملک گیر سطح پر احتجاج کیا گیا جو اب بھی جاری ہے۔