دونوں کمپنیوں کی نئی شرحیں تین دسمبر سے قومی سطح پر نافذالعمل ہوں گی۔ اب ووڈا فون آئیڈیا یا ایئرٹیل سے بھی دوسرے آپریٹرز پر ایک مقررہ حد سے زیادہ کال کرنے پر چھ پیسے فی منٹ کا چارج لگے گا۔
ووڈا فون نے اتوار کو جاری ایک بیان میں یہ اطلاع دیتے ہوئے پری پیڈ خدمات کے لیے دو روز میں 28 روز، 84 روز اور 365 روز کے نئے پلان پیش کیے۔ نئے پلان سابقہ پلان کے مقابلہ تقریبا 40 فیصد تک مہنگے ہیں۔
اس کے ساتھ ہی کمپنی نے دوسرے آپریٹرز پر کی جانے والی کال کی بھی حد مقرر کردی ہے۔ اب گاہک ووڈا فون آئیڈیا سے ایئر ٹیل، بی ایس این ایل اور جیو پر ایک مقررہ حد تک ہی کال کرسکیں گے۔
ووڈا فون سے ووڈا فون یا ووڈا فون سے آئیڈیا یا آئیڈیا سے ووڈا فون یا آئیڈیا سے آئیڈیا کی کال کو آن نیٹ کال مانا جائے گا جبکہ ووڈا فون آئیڈیا سے دوسرے آپریٹرز پر کال کو آف نیٹ کال مانا جائے گا اور مقررہ حد سے زیادہ کال کرنے پر چھ پیسے فی منٹ کا چارج لگے گا۔
اسی طرح سے ایئرٹیل کا ٹیرف 50 پیسے سے لے کر 2 اعشاریہ 85 روپے یومیہ مہنگا ہوگیا ہے۔ ایئرٹیل بھی مقررہ حد سے زیادہ کال کرنے پر 6 پیسے فی منٹ وصول کرے گا۔