بین ریاستی گاڑی چور گروہ کے دو ملزمین گرفتار

پولیس نے ارجن عرف رانچو اور راشد نام کے دونوں ملزمین کے پاس سے چوری شدہ 3 بائک برآمد کرنے کا دعوی کیا ہے۔

نوئیڈا کوتوالی سیکٹر-20 کی پولیس نے بین ریاستی گاڑی چور گروہ کے دو ملزمین کو گرفتار کیا ہے۔

پولیس نے ان کے پاس سے 3 مسروقہ بائیکس برآمد کرنے کا دعوی کیا ہے۔ سیکٹر -26 جے پوریا پلازہ کے پاس سے پکڑے گئے ملزمان کی شناخت راشد اور ارجن عرف رانچو کے نام سے ہوئی ہے۔ راشد سیکٹر 39 کے سالار پور کا رہنے والا ہے جب کہ ارجن سیکٹر 44 کا رہائشی ہے۔

پولیس کے مطابق گشت کے دوران پولیس کی ٹیم نے گاڑی چوری کے شبہ میں دو افراد کو پکڑا۔ تفتیش کے بعد چوری کی 3 بائیک برآمد ہوئیں۔ ان میں سے دو بائیک اسپلینڈر اور ڈسکور سیکٹر-31 اور فیز-2 سے چوری کی گئی تھیں۔

تفتیش میں انکشاف ہوا ہے کہ ملزمین مغربی اتر پردیش، دہلی اور ہریانہ میں گاڑیاں چوری کر کے فروخت کرتے تھے۔ دونوں ملزمان پہلے بھی نوئیڈا اور دیگر شہروں سے گاڑیوں کی چوری سمیت دیگر وارداتوں میں جیل جا چکے ہیں۔

ملزمین گزشتہ کچھ دن سے نوئیڈا میں سرگرم تھے اور گاڑیاں چوری کررہے تھے۔ راشد کے خلاف مختلف پولیس تھانوں میں 8 اور ارجن کے خلاف 4 مقدمات درج ہیں۔