کسانوں کو ملک مخالف قرار دینے والے خود پاکستان چلے جائیں: راگھو چڈھا

عام آدمی پارٹی رہنما اور ترجمان راگھو چڈھا نے کہا کہ نئے زرعی قوانین کے خلاف احتجاج کرنے والے کسانوں کو ملک کا دشمن کہنے والے خود ملک مخالف ہیں، انہیں پاکستان چلے جانا چاہیے۔

عام آدمی پارٹی کے رکن اسمبلی راگھو چڈھا نے کہا کہ 'بعض افراد ناراض اور احتجاج کر رہے کسانوں کو ملک مخالف قرار دے رہے ہیں تو ایسے افراد جو کسانوں کو ملک مخالف کہہ رہے ہیں میں ان سے کہنا چاہتا ہوں کہ وہ خود ملک مخالف ہیں اور ان کے لیے بھارت میں کوئی جگہ نہیں ہے انہیں پاکستان چلے جانا چاہیے۔

راگھو چڈھا کے بیان پر رد عمل ظاہر کرتے ہوئے بھارتیہ جنتا پارٹی(دہلی) کے ترجمان وریندر ببر نے کہا کہ 'بی جے پی سمیت سبھی لوگ کسانوں کے حامی ہیں۔ انہوں نے کہا کہ چڈھا کو یہ بات واضح کر دینی چاہیے کہ وہ ایسے افراد کو کیا جواب دینا چاہیں گے جو وزیر اعظم نریندر مودی کو مارنے کی باتیں کرتے ہیں۔

واضح رہے کہ متعدد مرکزی وزراء نے الزام عائد کیا ہے کہ کسانوں کے احتجاج کو ماؤ نوازوں، بائیں بازو پارٹیوں اور ملک مخالف عناصر نے ہائی جیک کیا ہے، تاہم ان سبھی الزامات کو کسانوں کے احتجاج کی رہنمائی کر رہے لیڈران نے یکسر مسترد کر دیا ہے۔

دو روز قبل راگھو چڈھا سمیت عام آدمی پارٹی کے دو دیگر لیڈران کو اُس وقت نظر بند کر دیا گیا جب وہ مرکزی وزیر امِت شاہ کی رہائش گاہ کے سامنے احتجاج کرنے کا منصوبہ بنان رہے تھے۔

اس سے قبل دہلی کے وزیراعلیٰ اروِند کیجریوال نے بھی بعض مرکزی وزراء اور بی جے پی رہنماؤں کی جانب سے احتجاج کر رہے کسانوں کو غدار اور ملک کا دشمن قرار دیئے جانے پر سخت ناراضگی کا اظہار کیا۔

واضح رہے کہ 'ستمبر میں زراعت سے متعلق پارلیمنٹ نے تین نئے زرعی قوانین پاس کیے گئے جس کی کسانوں نے شدید مخالفت کی اور گزشتہ دو ہفتوں سے ہزاروں کسان احتجاج کر رہے ہیں اور مرکزی حکومت سے قوانین واپس لینے کا مطالبہ کر رہے ہیں۔