اروند کیجریوال نے اسٹیپ ون کی جانب سے منعقد 'ڈاکٹرز ڈے' تقریب میں حصہ لیتے ہوئے مرکزی حکومت سے اپیل کی کہ کورونا وائرس کے دوران عوام کی خدمات کرنے اور کورونا کو مات دینے کے لیے مسلسل کوششیں کرنے والے ڈاکٹرز بھارت رتن کے سچے حق دار ہیں۔
کیجریوال نے کہا کہ بھارتی ڈاکٹرز کا مطلب سبھی ڈاکٹرز، نرسز اور پیرامیڈیکل اسٹاف ہے۔ بھارت رتن ایوارڈ سے کورونا کے دوران اپنی خدمات انجام دیتے ہوئے ہلاک ہونے والے ڈاکٹرز کو یہ سچا خراج عقیدت ہوگا۔
وزیراعلیٰ نے کورونا کے دوران ہلاک ہونے والے ڈاکٹرز اور فرنٹ لائن ورکرز کو پورے ملک کی جانب سے خراج عقیدت پیش کرتے ہوئے کہا کہ 'دہلی حکومت نے ہلاک ہونے والے ڈاکٹرز یا فرنٹ لائن ورکرس کے خاندان کو ایک ایک کروڑ روپے کی امدادی رقم دی ہے۔ یہ کوئی معاوضہ نہیں بلکہ یہ شکریہ کہنے کا ایک طریقہ ہے کہ ہم آپ کے شکر گذار ہیں۔
کیجریوال نے 'بھارتی ڈاکٹر' کو 'بھارت رتن ایوارڈ' دینے کے مطالبے کے سلسلے میں وزیراعظم نریندر مودی کو خط لکھ کر اپیل بھی کی ہے۔
انہوں نے خط میں لکھا ہے کہ 'ملک چاہتا ہے کہ رواں برس 'بھارت رتن ایوارڈ 'بھارتی ڈاکٹر' کو دیا جائے۔ اس کا مطلب کسی مخصوص شخص سے نہیں بلکہ ملک کے تمام ڈاکٹرز، نرسز اور پیرا میڈکل اسٹاف ہے۔
