مشتبہ پاکستانی عسکریت پسند 14 دنوں کیلئے پولیس ریمانڈ میں

قومی دارالحکومت دہلی سے گرفتار کیے گئے مشتبہ پاکستانی عسکریت پسند کو دہلی کی بٹیالہ ہاؤس کورٹ میں پیش کیا گیا تھا جہاں کورٹ نے اسے 14 دنوں کے پولیس ریمانڈ میں بھیج دیا۔

دہلی کے لکشمی نگر سے دہلی پولیس کے اسپیشل سیل نے ایک مشتبہ شخص کو گرفتار کر کے دہلی کورٹ میں پیش کیا۔ دہلی پولیس اسپیشل سیل نے کہا کہ تہواروں کے پیش نظر قومی دارالحکومت دہلی میں شدت پسندانہ حملے کا اندیشہ ہے، اس لیے وہ اس معاملے کو سنجیدگی سے لیتے ہوئے پوری طرح سے سرگرم ہے تاکہ کسی بھی طرح کے ناگہانی واقعہ سے نمٹا جاسکے۔

بشکریہ ٹویٹر

اسپیشل سیل نے الزام عائد کیا کہ گرفتار شخص آئی ایس آئی کے کہنے پر کام کر رہا تھا۔ پولیس نے ملزم کے پاس سے جدید ہتھیار اور دستی بم بھی برآمد کرنے کا دعویٰ کیا ہے۔

دہلی پولیس اسپیشل سیل نے بتایا کہ کچھ دن پہلے دہلی پولیس کو خفیہ معلومات ملی تھیں کہ قومی دارالحکومت دہلی میں شدت پسندانہ حملہ ہوسکتا ہے۔ اس حوالے سے دہلی پولیس کمشنر نے تمام ضلع پولیس اہلکاروں، خصوصی سیل اور کرائم برانچ کو الرٹ رہنے کی ہدایت دی تھی۔