دہلی: کورونا سے 80 برس کے بزرگ کی موت

قومی دارالحکومت دہلی کے مشرقی دہلی کے گنیش نگر علاقہ میں کورونا انفیکشن سے 80 برس کے ایک بزرگ کی موت ہوگئی۔ والد کے جنازے کے لئے حکومت سے مدد مانگنے والے بڑے بیٹے کی کسی نے بھی مدد نہیں کی۔ آخر کار پڑوسی مدد کے لئے آگے آئے اور بزرگ کی آخری رسوم ادا کی گئی۔

دراصل متوفی بزرگ شخص کا بیٹا اور بہو دونوں کورونا سے متاثر ہیں۔ بزرگ میں بھی کورونا کی علامات تھیں لیکن ان کی جانچ نہیں کی گئی تھی۔

متوفی کے بیٹے کے مطابق 'اس کے والد کی موت صبح 7.30 بجے ہوئی تھی ، دوپہر 12 بجے تک وہ مدد مانگتا رہا لیکن کوئی طبی عملہ اس کی مدد کے لئے نہیں آیا۔'

متوفی کے بیٹے نے ایک ویڈیو کے ذریعہ اپنے درد کا اظہار کیا تھا۔ یہ ویڈیو سوشل میڈیا پر وائرل ہورہی ہے۔