مقابلہ جاتی امتحان کی تیاری کرنے والے طالب علم نے کی خودکشی، پولیس تفتیش میں مصروف

دہلی یونیورسٹی علاقے کی کرسچن کالونی میں ایک طالب علم نے خودکشی کر لی ہے۔ طالب علم مدھیہ پردیش کے چھتر پور کا رہنے والا تھا۔ وہ دہلی میں رہ کر مقابلہ جاتی امتحان کی تیاری کر رہا تھا۔ Students Commits Suicide In Delhi

نئی دہلی:دہلی یونیورسٹی علاقے کی کرسچن کالونی میں رہنے والے ایک طالب علم نے خودکشی کر لی ہے۔ طالب علم دہلی میں رہ کر مقابلہ جاتی امتحان کی تیاری کر رہا تھا۔ خودکشی کرنے والے طالب علم کا نام ونے راج (25) ہے، جو اصل میں مدھیہ پردیش کے چھتر پور کا رہنے والا تھا۔ پولیس نے لاش کو کمرے سے باہر نکال کر پوسٹ مارٹم کے لیے بھیج دیا ہے۔

شمالی ضلع کے ڈی سی پی منوج کمار مینا نے کہا کہ گزشتہ اتوار کی رات تقریباً دس بجے ماریس نگر پولیس اسٹیشن کو پی سی آر کال موصول ہوئی۔ فون کرنے والے نے بتایا کہ ونے کمار نامی لڑکے نے پھانسی لگا کر خودکشی کر لی ہے۔ اطلاع ملنے پر پولیس موقع پر کرسچن کالونی پہنچ گئی۔ کیس کی تفتیش کے دوران پولیس کو پتہ چلا کہ طالب علم نے کمرے کو اندر سے بند کرکے خودکشی کی تھی۔ جہاں پولیس نے فائر ڈیپارٹمنٹ کو بھی دروازہ کھولنے کے لیے بلایا۔

قریبی لوگوں سے پوچھ گچھ سے معلوم ہوا کہ مرنے والا طالب علم مدھیہ پردیش کے علاقے چھتر پور کا رہنے والا تھا جو دہلی میں رہ کر مقابلہ جاتی امتحانات کی تیاری کر رہا تھا۔ اس کے علاوہ وہ اوپن اسکول کا طالب علم بھی تھا۔ تفتیش میں معلوم ہوا کہ متوفی ذہنی طور پر پریشان تھا، پولیس کو جائے واقعہ سے کوئی سوسائڈ نوٹ نہیں ملا۔

پولیس نے لاش کو پوسٹ مارٹم کے لیے بھیج کر معاملے کی تفتیش شروع کر دی ہے۔ اس کے علاوہ پولیس نے اہل خانہ کو واقعہ کی اطلاع دے دی ہے۔ اب گھر والوں سے پوچھ گچھ اور پوسٹ مارٹم رپورٹ آنے کے بعد ہی سارا واقعہ واضح ہو سکے گا۔