'ریاستیں لاک ڈاؤن کے ضابطوں پر سختی سے عمل کریں'

مرکزی وزارت داخلہ نے کچھ ریاستوں میں لاک ڈاؤن کے رہنما خطوط کے خلاف ورزی کی رپورٹوں کو سنجیدگی سے لیتے ہوئے ریاستی حکومتوں کو خط لکھ کر ان ضابطوں پر سختی سے عمل کرنے کے لیے کہا ہے۔

مرکزی داخلہ سکریٹری نے تمام ریاستوں اور مرکز کے زیرانتظام ریاستوں کے چیف سکریٹریوں کو خط لکھ کر کہا ہے کہ وزارت کو میڈیا رپورٹوں اور دیگر ذرائع سے پتہ چلا ہے کہ کچھ جگہوں پر لاک ڈاون سے متعلق رہنما خطوط کی خلاف ورزی کی جا رہی ہے۔

انہوں نے کہا کہ ریاستی حکومتوں کو اپنی سطح پر تمام ضروری قدم اٹھا کر ان پر روک لگانی چاہیے اور ہدایات پر سختی سے عمل کیا جانا چاہیے۔

انہوں نے کہا کہ ریاستوں کو کنٹینمنٹ زون سے کورونا وائرس کو پھیلنے سے روکنے کے لیے ہرممکن قدم اٹھانے چاہیے۔ اس کے ساتھ ہی رات کے كرفیو کو بھی سختی سے نافذ نہ کیے جانے کی اطلاع ملی ہیں۔

مرکزی داخلہ سکریٹری نے ریاستوں سے عوامی مقامات پر ماسک پہننے پر بھی پورا زور دینے کے لیے کہا ہے۔