Sarfaraz Khan Hits Another Tonسرفراز خان نے سلیکٹرز کو بلے سے جواب دیا، دہلی کے خلاف جارحانہ سنچری

سرفراز خان کو آسٹریلیا کے خلاف پہلے دو ٹیسٹ میچوں کے لیے بھارتی ٹیم میں جگہ نہیں ملی تھی۔ اب سرفراز نے ایک اور سنچری اننگز کھیل کر سلیکٹرز کو منہ توڑ جواب دیا۔ ممبئی کے بلے باز نے منگل کو ارون جیٹلی اسٹیڈیم میں کھیلے جارہے رنجی ٹرافی میچ میں دہلی کے خلاف شاندار سنچری بنائی۔Sarfaraz Khan Gives A Befitting Reply To Indian Selectors

ڈومیسٹک کرکٹ میں سرفراز خان نے شاندار مظاہرہ کیا ہے۔ 25 سالہ سرفراز نے اب رنجی ٹرافی میچ میں دہلی کے خلاف سنچری بنائی ہے۔ فرسٹ کلاس کرکٹ میں سرفراز خان کی اوسط ڈان بریڈمین کے بعد سب سے بہتر ہے۔ اس شاندار ریکارڈ کے باوجود سرفراز کو اب تک ٹیم انڈیا کے لیے کھیلنے کا موقع نہیں ملا ہے۔

سرفراز خان نے 125 رنز کی شاندار اننگز کھیلی۔ اس اننگز میں سرفراز نے 155 گیندوں کا سامنا کیا اور 16 چوکے اور چار چھکے لگائے۔ ان کی اننگز کا نتیجہ تھا کہ ممبئی کی ٹیم پہلی اننگز میں 293 رنز بنا سکی۔ سرفراز کی یہ اننگز اس لیے بھی اہمیت رکھتی ہے کیونکہ ممبئی کی ٹیم ایک وقت 66 رنز پر 4 وکٹیں گنوانے کے بعد جدوجہد کر رہی تھی۔

25 سالہ سرفراز خان اپنے فرسٹ کلاس کیریئر کا صرف 36 واں میچ کھیل رہے ہیں لیکن ان کی بلے بازی ڈان بریڈمین جیسی نظر آتی ہے۔ فرسٹ کلاس میچوں میں سرفراز خان نے 81.51 کی اوسط سے 3505 رنز بنائے ہیں جس میں 13 سنچریاں اور 9 نصف سنچریاں شامل ہیں۔ اگر دیکھا جائے تو دو ہزار سے زائد رنز بنانے والے کھلاڑیوں میں سرفراز خان سے صرف ڈان بریڈمین کی اوسط بہتر ہے۔

ڈان بریڈمین نے 234 میچوں میں 95.14 کی اوسط سے 28067 رنز بنائے۔ اس دوران ان کے بلے سے 117 سنچریاں اور 69 نصف سنچریاں نکلیں۔ بھارت کے وجے مرچنٹ اس معاملے میں تیسرے نمبر پر ہیں۔ مرچنٹ نے 150 فرسٹ کلاس میچوں میں 71.64 کی اوسط سے 13470 رنز بنائے۔ اس دوران مرچنٹ کے بلے سے 45 سنچریاں اور 52 نصف سنچریاں نکلیں۔

سرفراز خان نے رنجی ٹرافی کے رواں سیزن میں اب تک دھواں دار کھیل دکھایا ہے۔ سرفراز نے رنجی ٹرافی 2022-23 میں اب تک 8 اننگز میں 556 رنز بنائے ہیں، اس دوران سرفراز کی اوسط 111.20 رہی ہے اور انہوں نے تین سنچریاں اور ایک نصف سنچری اسکور کی ہے۔ سرفراز خان انڈین پریمیئر لیگ (IPL) میں دہلی کیپٹلز (DC) کا حصہ ہیں۔