دہلی: لاپتہ بچے کی لاش نالے سے ملی

قومی دارالحکومت دہلی کے امن وہارعلاقے میں پولیس کو تین روز سے گمشدہ بچے کی لاش ملی ہے۔

پولیس نے بچے کے پوسٹ مارٹم کے بعد لاش کو خاندان کے سپرد کردیا ہے۔
اطلاعات کے مطابق بچے کا نام سمرتھ ہے اور وہ کرکی ایکسٹینشن میں رہتا تھا۔
سمرتھ منگل کے شام اپنے گھر کےباہر سے لا پتہ ہو گیا تھا۔ جب دیر رات تک گھر نہیں پہنچا تو سمرتھ کے اہل خانہ نے اطراف کے علاقے میں اسے تلاش کرنا شروع کیا۔ جب کچھ پتہ نہیں چلا تو بچے کے والدین نے پولیس میں لاپتہ ہونے کا معاملہ درج کرایا۔
کچھ وقت کے بعد بچے کے والد کے پاس نامعلوم لوگوں نے فون کیا اور روپے کا مطالبہ کیا۔ بدمعاشوں نے بچے کو واپس لوٹانے کے لیے 25 لاکھ روپے کا مطالبہ کیا۔
سمرتھ کے والد نے رقم دینے کے لیے حامی بھر دی تھی۔ بدمعاشوں نے یہ کہہ کر فون رکھ دیا کہ وہ تھوڑی دیر میں دوبارہ فون کرکے بتائیں گے کہ پیسے کہاں لانے ہیں لیکن دوبارہ بدمعاشوں کا فون نہیں آیا اور جمعہ کے روز بچے کی لاش نالے سے برآمد کی گئی۔
سمرتھ کے خاندان نے پولیس پر لاپروائی برتنے کا الزام عائد کیا ہے۔