مودی کو ورلڈ کپ میچ میں شرکت کی فرصت مل گئی منی پور جانے کی نہیں: جے رام رمیش

کانگریس کے جنرل سکریٹری جے رام رمیش نے کہا کہ وزیر اعظم مودی کو احمد آباد میں ورلڈ کپ میچ میں شرکت کے لیے وقت مل گیا تاہم انہیں تشدد سے متاثرہ منی پور کا دورہ کرنے کا وقت نہیں مل سکا۔

نئی دہلی: کانگریس نے اتوار کے روز وزیر اعظم نریندر مودی پر سخت نکتہ چینی کرتے ہوئے کہا کہ وزیراعظم نریندر مودی کو احمد آباد میں کرکٹ ورلڈ کپ کے فائنل میچ میں شرکت کے لئے وقت مل گیا ہے، لیکن ابھی تک تشدد سے متاثرہ منی پورکا دورہ کرنے کے لئے وقت نہیں مل سکا۔

ایکس پر ایک پوسٹ میں کانگریس کے جنرل سکریٹری جے رام رمیش نے کہا کہ وزیر اعظم کی ترجیحات واضح ہیں "وزیر اعظم کو احمد آباد کے اسٹیڈیم میں آنے کا وقت مل گیا جس اسٹیڈیم کا نام انہوں نے اپنے نام سے رکھ لیا ہے۔ کل سے وہ راجستھان اور تلنگانہ میں کانگریس کو گالی دینے اور بدنام کرنے کے کام پر واپس آ جائیں گے۔ لیکن پھر بھی وزیراعظم مودی نے منی پور کا دورہ کرنا مناسب نہیں سمجھا جو اب بھی تناؤ کشیدہ حالات سے متاثر ہے۔ مودی کی ترجیحات واضح ہیں"۔

واضح رہے کہ منی پور میں پچھلے کئی ماہ سے تشدد برپا ہورہا ہے۔ عوامی وسرکاری املاک کو زبردست نقصان پہنچایا گیا۔ لاکھوں افراد بے گھر ہوگئے ہیں۔ تشدد سے متاثرہ منی پور کا وزیراعظم نے اب تک دورہ نہیں کیا۔ اپوزیشن پارٹیاں بالخصوص کانگریس لگاتار وزیراعظم مودی اور بی جے پی پر منی پور تشدد کے معاملے نکتہ چینی کرتی آرہی ہے۔ پارلیمنٹ کے ایوان میں اس مسئلہ کو اٹھایا گیا ہے۔ بی جے پی کے کسی بھی لیڈر نے منی پورہ کا دورہ نہیں کیا جبکہ اپوزیشن اتحاد انڈیا بلاک کے رہنماؤں نے منی پور کا دورہ کیا اور وہاں کے حالات کا جائزہ لیا تھا۔