فلسطینی سفارت خانے کے کونسلر فائق حمزہ کا دہلی کے ایک پرائیویٹ ہسپتال میں کورونا وائرس کی وجہ سے انتقال ہوگیا ان کی عمر 63 سال تھی۔ ان کی تدفین دہلی گیٹ قبرستان میں ہوئی جس کی ذمہ داری جمعیت کووڈ ہیلپ ٹیم نے انجام دی۔
ای ٹی وی بھارت کے نمائندے نے جمعیت العلماء ہند کی آپریشن ٹیم کی سرپرستی کر رہے مولانا ضیاء اللہ قاسمی سے بات کی۔ انہوں نے بتایا کہ فائق حمزہ کا انتقال 21 اپریل کو ہوا تھا، بھارت میں ان کے اہلخانہ موجود تھے لیکن ان کی تدفین کیسے اور کہاں ہو یہ بڑا مسئلہ تھا اور ہسپتال نے انہیں ایمبولینس خدمات دینے سے انکار کر دیا گیا تھا۔ چنانچہ اس کے حل کے لیے سفارت خانے کے میڈیا ایڈوائزر عبدالرازق نے جمعیت العلماء ہند کے ناظم عمومی مولانا محمود مدنی سے رابطہ کیا۔
مولانا محمود مدنی کی ہدایت پر جمیعت کی پوری ٹیم نے اس عمل کو انجام دیا ان کی لاش کو ہسپتال سے مولانا عظیم اللہ صدیقی اور ماسٹر شفیع اللہ نے ایمبولینس کے ذریعے دفتر پہنچایا وہیں نماز جنازہ مولانا کلیم الدین قاسمی کی امامت میں ادا کی گئی۔ اس کے بعد ان کے جسد خاکی کو دہلی گیٹ قبرستان لایا گیا جہاں انہیں باضابطہ فلسطینی چادر اور جھنڈے میں لپیٹ کر دفن کیا گیا۔