نئی دہلی: علامہ اقبالؒ نے شاعری سے عوام کو بیدار کیا

علامہ اقبالؒ کی شاعری اور نظریات خوابیدہ ذہنوں کو بیدار کرتے ہیں۔ علامہ اقبالؒ کی یاد میں پروگرام منعقد کرنے کا واحد مقصد علامہ اقبالؒ کو یاد کرنے کے ساتھ ساتھ ان کی فکر وخیال کو نئی نسل تک پہنچانے اور اس پر عمل پیرا ہونا ہے۔

شاعر مشرق ڈاکٹر علامہ محمد اقبال کے یوم پیدائش اور عالمی یوم اردو کے مناسبت سے عام آدمی پارٹی مائنارٹی ونگ دہلی پردیش کے تحت حاجی اکرام والی گلی نمبر 5 چوہان بانگر میں اردوڈے منایا گیا جس کے کنوینر عام آدمی پارٹی کے لیڈر عمران حسین تھے۔ نظامت کے فرائض مطلوب رعنا نے انجام دیے۔

علامہ اقبال نے شاعری سے عوام کو بیدار کیا

اس موقع پر دہلی اقلیتی کمیش کے چیئرمین ذاکر خان دہلی مائناریٹی ونگ کے چیئرمین حاجی محمد یونس، ڈاکٹر پرویز میاں، حاجی رئیس، حاجی افضال، انل کمار جین اور اختر صدیقی وغیرہ موجود تھے۔ اس موقع پر حاجی محمد یونس نے علامہ اقبال کی شاعری پر روشنی ڈالتے ہوئے کہا کہ ان کی شاعری اور نظریات خوابیدہ ذہنوں کو بیدار کرتے ہیں۔انہوں نے کہا کہ آج جو پروگرام منعقد کیا گیا ہے اس کا واحد مقصد علامہ اقبال کو یاد کرنے کے ساتھ ساتھ ان کی فکر وخیال کو نئی نسل تک پہنچانے اور اس پر عمل پیرا ہونا ہے۔ انہوں نے کہا کہ اقبال کی شاعری بنیادی طور پر حرکت وعمل اور مسلسل جدوجہد کا مطالبہ کرتی ہے۔ ڈاکٹر پرویز میاں نے علامہ اقبال کو یاد کرتے ہوئے کہا کہ علامہ اقبال کے قلم میں وہ تاثیر تھی کہ انہوں نے انگریزوں سے ملک کو آزاد کرایا بلکہ نوجوان نسل میں روح پھونکنے کی کوشش کی ہے۔

عام آدمی پارٹی لیڈر عمران حسن نے کہا کہ عام آدمی پارٹی مائنارٹی ونگ نے اقلیتی طبقے سے تعلق رکھنے والے مجاہدین آزادی پر پروگرام منعقد کرنے کا سلسلہ شروع کیا ہے جس کی ستائش دہلی شہر میں ہورہی ہے۔