وزیر اعظم کو جان سے مارنے کی دھکمی، ملزم نشے کی حالت میں گرفتار

مرکزی دہلی میں وزیر اعظم مودی کو جان سے مارنے کی دھمکی دینے والے ملزم کو پولیس نے گرفتار کر لیا ہے۔ ملزم نے نشے کی حالت میں پولیس اسٹیشن میں فون کر کے وزیر اعظم کو جان سے مارنے کی دھمکی دی تھی۔

مرکزی دہلی میں ایک 35 سال کے شخص نے پولیس کو فون کر کے وزیر اعظم مودی کو جان سے مارنے کی دھمکی دی۔ جیسے ہی یہ دھمکی آمیز فون آیا، پولیس کی ٹیم فوری طور پر حرکت میں آ گئی اور ملزم کی تلاش شروع کر دی۔

حالانکہ پولیس کو زیادہ محنت نہیں کرنی پڑی اور ملزم جلد ہی پولیس کی گرفت میں آگیا۔ جب پولیس نے اسے پکڑا تو وہ پوری طرح سے نشہ میں دھت تھا۔ وہ کچھ بھی بولنے کی حالت میں نہیں تھا۔ جس کے پیش نظر پولیس اسے میڈیکل کے لیے اسپتال لے گئی۔

ڈی سی پی انگت پرتاپ سنگھ کے مطابق، ملزم کی شناخت 35 سالہ پنٹو سنگھ کے طور پر کی گئی ہے۔ ملزم پیشے سے کارپینٹر ہے اور ساگرپور کے علاقے کیلاش پوری میں رہتا ہے۔

نشے کی حالت میں اس نے اچانک پولیس کو فون کر کے وزیر اعظم کو مارنے کی دھمکی دے ڈالی۔ اتنا ہی نہیں، اس نے پولیس سے وزیر اعظم کو مارنے کے لیے 50 کروڑ سپاری دینے کی بات بھی کہی۔ پولیس ملزم کے گھر والوں سے بھی پوچھ گچھ کر رہی ہے۔

پولیس کے مطابق اس کا رام منوہر لوہیا اسپتال میں علاج کرایا جا رہا ہے۔ ملزم شادی شدہ ہے اور شراب پینے کا عادی ہے۔ فی الحال پولیس معاملے کی جانچ میں مصروف ہے۔