قومی دارالحکومت دہلی کے وزیر اعلی اروند کیجریوال نے جنوب مغربی دہلی میں واقع کھرکھری ناہر گاؤں میں پرالی کو گلانے کے لیے بنائے گئے دی کمپوزر گھول تیاری مرکز کا معائنہ کیا اور گھول بنانے کے عمل کو سمجھا۔
دہلی حکومت، پوسا ریسرچ انسٹی ٹیوٹ کی نگرانی میں پرالی کے ڈنٹھل کو کھیت میں گلاکر کھاد بنانے کے لیے اس گھول کی تیاری کر رہی ہے۔
انہوں نے کہا کہ دہلی حکومت اس گھول کا چھڑکاو تقریباً 700 ہیکٹیئر زمین پر اپنے خرچ سے کرے گی اور کسانوں پر کوئی مالی بوجھ نہیں پڑے گا۔
کسانوں کو اپنے کھیت میں اس گھول کے چھڑکاو کے لیے اپنی رضامندی دینی ہوگی۔
آئند ہ سات دن کے بعد یہ گھول بن کر تیار ہوجائے گا اور 11 اکتوبر سے دہلی کے الگ الگ علاقوں میں گھول کا چھڑکاو کیا جائے گا۔
یہ تجربہ کامیاب رہتا ہے تو دیگر ریاستوں کے کسانوں کو بھی پرالی کا ایک حل مل جائے گا۔
مسٹر کیجریوال نے کہا کہ مجھے بہت خوشی ہے کہ پوسا ریسرچ انسٹی ٹیوٹ نے پرالی کے نمٹارہ کا حل تلاش کرلیا ہے جو بہت سستا اور آسان ہے۔
انہوں نے کہا کہ پوسا ریسرچ انسٹی ٹیوٹ نے کچھ کیپسول بنائے ہیں اس کیپسول کے ذریعہ گھول بنایا جاتا ہے۔ اس گھول کو اگر کھیتوں میں کھڑی پرالی کے ڈنٹھل پر چھڑک دیا جائے تو وہ ڈنٹھل گل جاتا ہے اور گل کرکے خود کھاد میں تبدیل ہوجاتا ہے۔
